Propozimi për shtrenjtimin e rrymës – Opozita kritikon Qeverinë: Qytetari paguan katër here faturën e rrymës
Të enjten e 20 janarit në seancën plenare të Kuvendit të Kosovës ku po diskutohet për krizën energjetike në vend dhe propozimin e Zyrës së Rregullatori të Kosovës për shtrenjtimin e rrymës, deputeti nga radhët e Partisë Demokratike të Kosovës, Ferat Shala ka thënë se propozimi në fjalë është jashtëzakonisht jo profesionale.
Sipas tij propozimi i ZRRE-së është një miks kalkulimesh e linjash buxhetore jashtë çdo parimi profesional dhe human, por edhe Ligjor.
“Analiza e ZRRE-së është jashtëzakonisht e keqe, kjo është pasqyra më reale e Qeverisë Kurti që na ofrohet sot”. ka thënë Shala.
Për Shalën ky raport nuk pasqyron e as nuk parasheh asnjë rresht asnjë shifër zgjidhjen e tarifës së konsumatorëve për pjesën Veriore të Kosovës.
“Pra Qeveria nuk po guxon dhe nuk duhet të lejoj që tash e tutje të rrjedhin parat pa kontrolluara drejt pjesës veriore të Kosovës e që janë me qindra miliona euro. Si PDK kërkojmë nga Qeveria dhe nga ky kuvend ta kthej në pikën zero këtë propozim të ZRRE-së”.
Ndërsa shefi i Grupit Parlamentar i Aleancës për Ardhmërinë e Kosovës, Besnik Tahiri gjatë fjalimit të tij ka thënë se qytetari i Kosovës paguan katër herë faturën e rrymës.
“Një herë e paguan faturën e KEDS-it, herën e dytë e paguan subvencionin që shteti – kjo Qeveri i jep 75 milion euro, herën e tretë paguan për të gjithë ato familje edhe të gjithë atë amvisni që shpenzojnë deri në 600kilovat orë dhe herën e katërt paguajnë për qytetarët serb të Veriut të cilët nuk e paguajnë rrymën”, ka thënë Tahiri.
E në anën tjetër shefi i Grupit Parlamentar i Lidhjes Demokratike të Kosovës, Arben Gashi, gjatë fjalimit të tij në Kuvendin e Kosovës ka thënë se qytetarët e vendit po përballen me një krizë energjetike të pazakonshme dhe me një kërcënim nga Qeveria për rritjen e energjisë elektrike “rreth 300%”.
Ai ka thënë se vetëm një vit më parë kryeministri i Kosovës, Albin Kurti e projektonte vetën si “një magjistarë politik që do ta ndryshonte edhe rendin botëror” duke krijuar përshtypjen për vete se bota ishte në pritje të tij, e tani kur kaluan një vit sipas Gashit, Kurti “as nuk u shndërrua në politikan botëror, por u shndërrua në një politikan në thelb i cili prodhon përditë probleme për vendin e tij”.
Gashi tutje ka thënë se Kurti u shndërrua në “politikan akrobat që e ka shndërruar Kosovën në një cirk terri, duke shfaqur paaftësinë e tij qeverisëse. Ti e refuzove blerjen e energjisë elektrike, ti e refuzove gjitha projektet që kanë të bëjnë me thëngjill, me erë, me ujë, me solar dhe nuk ofrove asnjë zgjedhje”, ka thënë ai.
Ndërsa në anën tjetër Për Shefen e Grupit parlamentar të Lëvizjes Vetëvendosje, Mimoza Kusari-Lila, kthimi i bllok tarifave është e pa evitueshme ashtu si ka propozuar Zyra e Rregullatorit të Kosovës pas krizës energjetike në vend.
“Bashkë me kthimin e shprehisë së kursimit dhe vetëdijesimit të konsumatorëve për kursimin e energjisë gjë e cila u hoq në vitin 2017”, ka thënë Kusari-Lila.
Sipas saj nuk mund të fajësohet Qeveria aktuale për situatën energjetike në vend dhe se partitë që kanë qenë në pushtet në të kaluarën duhet të reflektojnë.
“Mungesa e vendimeve ndër vite në veçanti në sektorin e energjisë po ndjehet sot më shumë se kurrë. Sado që duam apo duan ta faturojnë këtë situatë energjetike Qeverisë duhet të bëjë reflektim mbi rrethanat e mungesës së vendimmarrjes që e kishin gjashtë qeveri përpara”, ka thënë ajo.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Gjykata e Lartë rrëzon sërish Belerin, nuk betohet dot si kryebashkiak
-
Trupa gjykuese në Arizona padit aleatët e Trump për skemën e rreme zgjedhore të vitit 2020
-
Raportimet e Albanian Post – PSD përuron “çeshmen e milionerëve” për nder të Liburn Aliut
-
Mexhiti pasi humbi zgjedhjet: Gjithçka po shkon sipas planit, regjimi Ahmeti, Grubi, Osmani do të bjerë