Prokuroria kërkon caktimin e masës së paraburgimit ndaj drejtorit të “VisaMetric-ut”

Prokuroria Themelore në Prishtinë, ka kërkuar caktimin e masës së paraburgimit ndaj drejtorit të ‘VisaMetric-ut’.

Lajmin për Albanin Post e ka konfirmuar zëdhënësja e Prokurorisë së Prishtinës, Laureta Ulaj.

“Ju njoftojmë se Prokurorja e Shtetit, pranë Gjykatës kompetente ka paraqitur kërkesë për caktimin e masës së paraburgimit ndaj të pandehurit, për veprën penale “Mosekzekutimi i vendimeve gjyqësore”, sipas KPRK-së”, deklaroi Ulaj për AP.

Më 23 maj, Prokuroria Themelore në Prishtinë, kishte ndaluar për 48 orë drejtorin e VisaMetric-ut i cili është shtetas turk.

Më 18 maj, Prokuroria Themelore në Prishtinë kishte pranuar kallëzim penal ndaj kompanisë “VisaMetric” së cilës Gjykata Komerciale e Kosovës ia kishte ndaluar që të marrë nga 30 euro për shërbime postare për pasaportat e qytetarëve.

Kompania “Visametricut” është kompani që ofronte shërbime të autorizuara nga përfaqësitë gjermane në Kosovë për të trajtuar shërbimet e mbështetjes për aplikimin për viza.

Mirëpo, pas vendimit të Gjykatës Komerciale “Visametricut” i është ndaluar ky veprim.

Ky vendim i Gjykatës ka ardhur pas inicimit të avokatit Flamur Abdullahu që kishte iniciuar në Gjykatën Komerciale rastin e operatorit ekonomik VisaMetric L.L.C që shërbimi postar në vlerë prej 30 eurosh të mos jetë obligativ për aplikantët për viza në Ambasadën Gjermane.

Edhe ambasadori i Gjermanisë në Kosovë, Jorn Rohde ishte pyetur nga gazetarët për këtë çështje, mirëpo ai ishte përgjigjur shkurt duke thënë se “s’kam koment. Flisni me Visametricun”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.