Lajme

Pro legalizimit të abortit dhe qytetarët e San Marino-s


Qytetarët e San Marinos, të dielën kanë votuar pro legalizimit të abortit, duke hedhur poshtë ligjin 150-vjeçar.

Rreth 77% e votuesve miratuan propozimin për ta bërë abortin të ligjshëm, në 12 javët e para të shtatzënisë, sipas njoftimeve zyrtare të mediave shtetërore.

Pjesëmarrja në referendum ishte 41%, pra 33 mijë njerëz.

Aborti gjithashtu do të jetë i ligjshëm edhe nëse jeta e gruas apo shëndeti i saj fizik ose psikologjik është në rrezik, për shkak të anomalive ose keq-formimeve të fetusit.

Me votat pro, Parlamenti i San Marinos duhet të hartojë një projekt-ligj për të legalizuar procedurën.

San Marino, ka qenë një nga shtetet e fundit evropiane që e cilësonte abortin si “krim”.

Me rezultatin e së dielës, tani ajo bashkohet me shtetet e tjera katolike si Irlanda, e cila legalizoi abortin në vitin 2018 dhe Italinë fqinje, ku aborti është i ligjshëm që nga viti 1978.

Aborti është ende i paligjshëm në Maltë dhe Andorra, ndërsa Polonia vendosi ndalim pothuajse total të procedura këtë vit.

Referendumi në San Marino u vendos, pasi rreth 3 mijë njerëz nënshkruan kërkesë për peticion, për të përmbysur ligjin e abortit, i cili daton që nga 1865.

Gratë në San Marino që kërkojnë të abortojnë, zakonisht shkojnë në Italinë fqinje për të proceduar. Por përkrahësit e referendumit argumentuan se është barrë e rëndë financiare dhe theksuan rastin e shtatzënisë si pasojë e përdhunimit.

Sara Casadei e fushatës “Noi Ci Siamo” që loboi pro në referendum, u shpreh e kënaqur me rezultatin.

“Ne e mbështetëm këtë nismë për arsyen e thjeshtë se është e drejtë që gratë të kenë një zgjedhje dhe të mos detyrohen të shkojnë diku tjetër. Ata duhet të kenë shërbimet e abortit dhe në vendin tonë”, tha ajo.

Dr. Maria Prassede Venturini, pediatre dhe përfaqësuese e fushatës “Mirë se vini në jetë” që doli kundër  referendumit, tha se grupi i saj do vazhdojë të punojë për një “kulturë mikpritëse të jetës” që përqendron kujdesin në “dy protagonistët kryesorë: nënën dhe fëmijë”.

Kundërshtarët kanë argumentuar se në San Marino, edhe të miturit mund të marrin kontracepsion falas në farmaci, përfshirë pilulën e mëngjesit. Kisha Katolike e ka kundërshtuar ashpër vendimin.

Në mbledhje, peshkopi i San Marinos, Imzot Andrea Turazzi, tha se Kisha Katolike ishte “përfundimisht kundër” nismës së dekriminalizimit.

Megjithëse ai tha se fushata ka rritur ndërgjegjësimin në lidhje me nevojën për të ofruar shërbime dhe kujdes më të mirë, veçanërisht për nënat në nevojë.

Marrë nga Euronews, përshtatur për Albanian Post.

/Albanianpost.com


Lajmet kryesore