Sport

Pritet me brohoritje alpinistja që garoi pa hixhab


Një turmë e madhe në aeroportin e Teheranit përshëndeti alpinisten sportive iraniane, e cila konkurroi pa shami në një garë në Korenë e Jugut, duke e quajtur atë një “heroinë”.

Elnaz Rekabi, 33 vjeç, theu kodin e rreptë të veshjes së Iranit – por më vonë tha se hixhabi i saj kishte rënë “pa dashje”.

Shumë janë skeptikë për arsyen që ajo dha në një postim në Instagram dhe e përsëriti në një intervistë televizive shtetërore në aeroport, duke besuar se ishte bërë me detyrim.

“Kërkoj falje për zhurmën dhe përçarjen që kam shkaktuar. Më duhet të them se për shkak të entuziazmit tim në finalen e Kampionatit Aziatik në Korenë e Jugut, mbulesa më ra aksidentalisht për shkak të kohës së vështirë. Dhe tani, siç ishte planifikuar, jam në rrugën time për në Iran, e shoqëruar nga ekipi”, shkruante alpinistja.

Irani është i mbërthyer nga protesta kundër ligjeve të hixhabit dhe liderëve të tij klerik.

Grave iraniane u kërkohet të mbulojnë flokët me shami, krahët dhe këmbët me rroba të gjera. Atletet femra duhet gjithashtu t’u përmbahen rregullave kur ato përfaqësojnë zyrtarisht Iranin në garat jashtë vendit.

Rekabi fluturoi nga Koreja e Jugut para agimit të së mërkurës, ku ajo kishte qenë duke konkurruar në Kampionatin Aziatik IFSC.

Familja e saj e priti në aeroport. Ajo i mbuloi flokët me një kapuç bejsbolli të zi.

Videot në mediat sociale tregojnë qindra mbështetës jashtë terminalit duke duartrokitur dhe duke brohoritur “Elnaz është një heroinë” ndërsa ajo mbërriti.

Një ditë më parë pati aludime se Rekabi ishte zhdukur dhe më pas se ishte arrestuar nga shërbimi sekret iranian në Seul.

Në një postim në Twitter të martën, ambasada iraniane në Seul tha se Rekabi “u nis nga Seuli në Iran, herët në mëngjes të 18 tetorit 2022, së bashku me anëtarët e tjerë të ekipit”.

“Ambasada e Republikës Islamike të Iranit në Korenë e Jugut mohon fuqishëm të gjitha lajmet e rreme, dhe dezinformatat në lidhje me Elnaz REKABI”, thuhet në deklaratë.

Vitin e kaluar, Rekabi u bë gruaja e parë iraniane që fitoi një medalje në kampionatin botëror të ngjitjeve sportive. Ajo doli e katërta në eventin e fundjavës së kaluar në Korenë e Jugut. Një videoklip e tregoi atë duke u ngjitur në një mur me flokët e lidhur prapa në një bisht gjatë ngjarjes.

Shërbimi sekret iranian arreston kampionen e alpinizmit

/Albanianpost.com

Lajmet kryesore