Prindërit e ‘Mbretit të Kriptove’ paditen për mashtrimin me miliona dollarë

Prindërit e themeluesit të FTX, Sam Bankman-Fried, janë paditur pasi dyshohet se kanë marrë në mënyrë të parregullt para nga firma e kriptove përpara rënies së saj.

Në një dosje, menaxherët e firmës së falimentuar e akuzojnë çiftin për mbajtjen e miliona dollarëve ‘të transferuar me mashtrim” dhe për mbylljen e syve ndaj sjelljes së keqe në kompani.

Rënia e kompanisë çoi në arrestimin e Bankman-Fried vitin e kaluar.

Prokurorët amerikanë kanë akuzuar ish-miliarderin se ka transferuar ilegalisht miliona para nga bursa për të mbyllur humbjet në firmën e tij tregtare, për të bërë donacione politike dhe për të blerë prona.

Ai i ka mohuar akuzat dhe është në burg në pritje të gjykimit muajin e ardhshëm.

Sakaq, avokatët e prindërve të tij kanë thënë se pretendimet kundër tyre ishin të rreme dhe të dizajnuara për të dëmtuar shanset e djalit të tyre në gjyq.

Veprimi ligjor, i paraqitur si pjesë e një padie më të gjerë falimentimi, thotë se prindërit e Bankman-Fried shfrytëzuan “aksesin dhe ndikimin e tyre brenda ndërmarrjes FTX për të pasuruar veten, drejtpërdrejt dhe tërthorazi, me miliona dollarë”.

Ata morën një dhuratë prej 10 milionë dollarësh nga fondet që i përkisnin Alameda, një kompani partnere e FTX, ndërsa FTX gjithashtu u dha atyre një pronë prej 16.4 milionë dollarë në Bahamas, sipas dosjes.

FTX dikur ishte një nga firmat më të mëdha të tregtimit të kriptomonedhave në botë, duke mbajtur asete me vlerë rreth 15 miliardë dollarë në vitin 2021.

Por paraqiti falimentimin vitin e kaluar, pas një nxitimi të papritur nga klientët për të tërhequr fonde që zbuloi një hendek të madh në financat e kompanisë që thuhet se vlen deri në 8 miliardë dollarë.

Dosja pretendon se babai i tij, Allan Joseph Bankman, një ekspert në ligjin e taksave në SHBA, shërbeu si këshilltar i FTX dhe “luajti një rol kyç në vazhdimësinë e kësaj kulture të keqmenaxhimit të rëndë dhe ndihmoi në fshehjen e akuzave që do të kishin ekspozuar mashtrimin”.

Gjithashtu ndihmoi në shfuqizimin e një ankese të brendshme që pretendonte manipulim të çmimeve të bëra në vitin 2019.

Ndërkohë, nëna e Bankman-Fried, Barbara Fried, ndihmoi në drejtimin e donacioneve politike të djalit të saj, duke e inkurajuar atë të fshehë burimin e tyre.

Sakaq, rënia e Bankman-Fried, një prej lojtarëve më të profilit të lartë në industri, shkaktoi tronditje në sektor dhe ndihmoi në nxitjen e kontrollit rregullator.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.