Shqipëria

Primaret e Berishës, reagon PD: Farsë e radhës nga grupi i “Sali non grata-s”


Komisioni i Rithemelimit, i krijuar prej lëvizjes së Sali Berishës brenda Partisë Demokratike me vendim të Kuvendit të 11 dhjetorit, shpalli zyrtarisht primaret për kandidaturat e zgjedhjeve të pjesshme lokale të 6 marsit në gjashtë bashki të vendit.

Mirëpo, nga radhët e PD-së, gjithçka thuhet mbi këtë gjë, është se kjo mbetet “një farsë e radhës, me të cilën Berisha po përpiqet të dëmtojë demokratët për interesat e tij personalë”.

“Partia Demokratike njofton gjithë simpatizantët dhe votuesit e saj se emrat e shpallur sot nga grupimi i Sali Non-Gratës, nuk janë kandidatë të PD-së”.

Kështu nis postimi reagues në Facebook, nga faqja zyrtare e forcës politike.

Më tej, aty shtohet se Berisha mund të përdorë çdo njeri për hallin e tij personal, por këto gjëra nuk kanë aspak të bëjnë me PD-në.

“Ky është përdorimi dhe mashtrimi i radhës që Sali Berisha u bën edhe atyre pak demokratëve që nuk e kanë kuptuar akoma hallin e tij”, përmbyllet komenti.

Sakaq, Komisioni i Rithemelimit në shpalljen e primareve, ka nxjerrë edhe listat e garuesve për t’u bërë kandidatë në zgjedhjet e 6 marsit.

Një surprizë ishte ajo e Shkodrës ku nuk garon Voltana Ademi. Megjithatë, një emër me peshë politike si ish-deputeti Bardh Spahia, është në listë.

Në tërësi, listat përbëhen nga 22 kandidatë. Prej tyre, vetëm gjashtë do të zgjidhen për të shkuar në lokalet e 6 marsit.

22 kandidatë në garë

Në të gjashtë bashkitë, ka disa emra kandidatësh, ku totali shkon në 22 të tillë.

Në Shkodër, emri më i njohur është ai i Bardh Spahisë, teksa kryetarja aktuale, Voltana Ademi, nuk është në listën e garuesve të Berishës, siç mendohej.

Pesë të tjerë do të garojnë po ashtu në primaret e Shkodrës, duke e çuar në gjashtë totalin.

Përveç Spahisë, ata janë Alfred Kocobashi, Arben Maliqi, Astrit Bushati, Irena Shala dhe Irma Kopliku. Tre të parët janë juristë, Spahia mjek, Shala ekonomiste dhe Alushi vjen nga sfera pedagogjike, përkatësisht matematika.

Në Dibër, tre do të jenë garuesit nga kampi Berisha.

Behar Dema, Dafina Muda dhe Premtim Kryemadhi, do të sfidohen për vendin e kandidatit në bashkinë veriore të vendit.

Në Durrës, dy janë kandidatët. Urbanisti Ardian Muka dhe informaticienja Silvja Gjepali.

Nga ana tjetër, në Lushnjë, janë katër garues në primare.

Arben Zaimi, Elton Bano, Eurion Iljazi dhe Indrit Qerimi do të garojnë. Dy të parët janë nga bota e avokatisë dhe dy të tjerët nga ajo e edukimit fizik.

Pesë kandidatë do të shohë Rrogozhina në primaret e 30 janarit.

Eqerem Deliu, Hajrulla Tafa, Hekuran Xhani, Sokol Gosa dhe Vladimir Manushi, do të kërkojnë votën për vendin e kandidatit.

Në bashkinë e fundit, atë të Vorës, gara do të jetë mes dy kandidatëve. Inxhinieri Luan Beta dhe ekonomisti Lulzim Vrana, përballen për vendin e kandidatit.

Primare

Konceptin e primareve, Sali Berisha e prezantoi nëpërmjet një postimi në Facebook. Sipas tij, ato do të bazohen në formulën amerikane të primareve. Mirëpo, për shkak të kohës, diçka e tillë është e pamundur dhe nuk do të ketë një fushatë të mirëfilltë për ato të 30 janarit.

Një tjetër gjë që është bërë me dije, është edhe vendi ku ato do të zhvillohen në qytetet përkatëse.

Kështu, në Dibër, votohet në Pallatin e Kulturës, Peshkopi. Në Durrës, votohet në Pallatin e Kulturës “Aleksandër Moisiu”.

Lushnja voton në zyrën e degës së Partisë Demokratike Lusnjë.

Rrogozhina në bar “Antika”.

Shkodra, do të ketë një ndarje me tre qendra votimi. E para në qytet, e dyta në Velipojë dhe e treta me qendra të dedikuara në rrethina.

Vora, voton në degën e Partisë Demokratike Vorë.

/Albanianpost.com


Lajmet kryesore