Presidenti iranian anulon intervistën me CNN, pasi gazetarja refuzoi të mbajë shami

Presidenti iranian, Ebrahim Raisi, anuloi një intervistë me rrjetin amerikan “CNN” pasi një nga spikeret, Christiane Amanpour, refuzoi të mbante hixhabin gjatë intervistës.

“Kjo do të ishte intervista e parë e Presidentit Raisi në tokën amerikane, gjatë vizitës së tij në SHBA. Pas javësh planifikimi dhe tetë orësh vendosjeje të pajisjeve të përkthimit, dritave dhe kamerave, ne ishim gati. Por asnjë shenjë e Presidentit Raisi ”, shkroi vetë Amanpour në Twitter.

40 minuta pasi duhej të fillonte intervista, një ndihmës i presidentit iu afrua dhe i kërkoi asaj të mbante një shami.

“Kam refuzuar me mirësjellje”, ka shkruar spikerja duke shtuar se “ne jemi në New York”, ku nuk ka asnjë ligj apo traditë në lidhje me shamitë.

Ajo i kishte theksuar se asnjë president i mëparshëm iranian nuk e ka kërkuar këtë kur i ka intervistuar jashtë Iranit.

Por, ndihmësi e bëri të qartë se intervista nuk do të ndodhte nëse gazetarja nuk do të mbante shami.

And so we walked away. The interview didn’t happen. As protests continue in Iran and people are being killed, it would have been an important moment to speak with President Raisi. 7/7 pic.twitter.com/kMFyQY99Zh

— Christiane Amanpour (@amanpour) September 22, 2022

“Ai tha se ishte çështje respekti dhe iu referua situatës në Iran – duke aluduar për protestat që përfshinë vendin. Përsëri, thashë se nuk mund të pajtohesha me këtë kusht të paprecedentë dhe të papritur”.

Amanpour u largua dhe intervista nuk u zhvillua.

“Ndërsa protestat vazhdojnë në Iran dhe njerëz po vriten, do të kishte qenë një moment i rëndësishëm për të folur me Presidentin Raisi.”

Javën e kaluar, Raisi dha një intervistë për programin 60 Minuta të CBS. Gazetarja e CBS, Leslie Stahl, përshkroi se si asaj i thanë “si të vishej, të mos ulet para tij dhe të mos e ndërpresë atë”.

Intervista e anuluar vjen mes protestave intensive në të gjithë Iranin pas vdekjes së Mahsa Amini, e cila vdiq pasi u arrestua dhe u raportua se u rrah nga policia morale në Teheran.

Protestat kanë përfshirë pjesë të vendit gjatë pesë ditëve të fundit. Demonstratat kanë tronditur vendin.

Ndërkohë, mediat sociale kanë shfaqur femrat duke u futur në qoshe nga burra me helmeta në motoçikleta dhe duke u rrahur.

Shumë gra e kanë hequr shaminë në shenjë proteste kundër policisë së moralit, e cila po zbaton hixhabin në përputhje me një dekret të lëshuar nga kryesia e re e presidentit, Raisi.

Raisi, në asamblenë e përgjithshme të OKB-së, nuk përmendi demonstratat apo Amini-n me emër, por kritikoi vendet perëndimore për reagimet e tyre ndaj “një incidenti nën hetim në Iran”.

Referuar zyrtarëve të atjeshëm, po zhvillohet një hetim për shkakun e vdekjes së Amini-n. Megjithatë, protestuesit kanë pak besim në një hetim të brendshëm dhe duan që policia e moralit të shfuqizohet.

Vizita e Raisi-t në New York është e ndërlikuar nga përpjekjet për t’i dorëzuar atij një vendim në një padi civile që e akuzon atë për torturë në një çështje të ngritur nga tre ish të burgosur politikë, përfshirë Kylie Moore-Gilbert, akademikja britaniko-australiane e mbajtur në Iran.

Asnjë akt nuk mund t’i dorëzohet atij në selinë e OKB-së, por mund të bëhen përpjekje jashtë ndërtesës.

Çështja e paraqitur në gjykatën e New York-ut akuzon Raisi-n për mbikëqyrjen e torturës dhe keqtrajtimit të tre të burgosurve.

Tre paditësit janë Moore-Gilbert, Mehdi Hajati, një ish-këshilltar i qytetit të Shirazit dhe akademiku belgo-iranian dhe ish-peng Hamid Babaei.

Moore-Gilbert ka treguar se ka kaluar dy vjet e tre muaj të privuar nga liria krejtësisht padrejtësisht, pa asnjë bazë faktike.

Gjatë paraburgimit, ajo ka “pësuar tortura fizike dhe psikologjike” që i kanë mbetur edhe sot e kësaj dite.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.