Preferojmë diplomacinë për të zgjidhur krizën e Niger-it, thotë Blinken

Diplomacia është alternativa më e mirë për komunitetin ndërkombëtar për t’u marrë me krizën e grushtit të shtetit në Niger, tha të hënën Sekretari Amerikan i Shtetit Antony Blinken.

“Diplomacia është sigurisht mënyra e preferuar për zgjidhjen e kësaj situate”, tha kryediplomati amerikan për Radion Franceze RFI.

“Është qasja aktuale e ECOWAS. Është qasja jonë”, tha ai, duke iu referuar bllokut të Afrikës Perëndimore mes përpjekjeve për të rivendosur presidentin e zgjedhur në mënyrë demokratike Mohamed Bazoum, i cili u arrestua javën e kaluar.

Udhëheqësit e Komunitetit Ekonomik të Shteteve të Afrikës Perëndimore (ECOWAS) do të takohen sërish të enjten në Abuja, kryeqyteti i Nigerisë, për të diskutuar situatën në Niger, dy javë pas grushtit të shtetit, tha ECOWAS në një deklaratë për shtyp.

Në një samit të mëparshëm në Abuja më 30 korrik, udhëheqësit e Afrikës Perëndimore i dhanë ushtrisë nigeriane një javë për të rivendosur presidentin e zgjedhur Mohamed Bazoum, i cili aktualisht po mbahet i burgosur.

Shefat e shtabit të rajonit madje kishin vizatuar “skicat” e një ndërhyrjeje të mundshme të armatosur, por ajo nuk u shkaktua kur ultimatumi skadoi të dielën në orën 23:00 GMT.

Sipas një burimi të afërt me ECOWAS-it, në këtë fazë nuk parashikohet një ndërhyrje, prandaj rruga e dialogut duket se është ende në tavolinë.

Një diplomate e lartë amerikane, Victoria Nuland, tha të hënën se ishte takuar me puçistët në Niamey.

“Këto diskutime ishin jashtëzakonisht të sinqerta dhe nganjëherë mjaft të vështira”, u tha ajo gazetarëve me telefon.

Nuland, ushtruese e detyrës numër dy për diplomacinë amerikane, tha se ajo takoi gjeneral brigade Moussa Salaou Barmou, shefin e ri të shtabit të ushtrisë, dhe zyrtarë të tjerë, por nuk ishte në gjendje të takohej as me kreun e ushtrisë në pushtet, gjeneral Abdourahamane Tiani, as me presidentin e rrëzuar Mohamed Bazoum.

Ajo tha se ofroi “shumë opsione” për t’i dhënë fund grushtit të shtetit.

Zyrtarja amerikane sqaroi gjithashtu se gjenerali Barmou ishte në dijeni të bashkëpunimit mes Niger-it dhe Shteteve të Bashkuara, për shkak të përfshirjes së tij në të kaluarën në forcat speciale.

Niger: Cilat janë opsionet e ECOWAS-it për të kthyer grushtin e shtetit?

Çfarë po ndodh me grushtin e shtetit në Niger dhe implikimet e tij ndërkombëtare

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.