Pranon të paguhet rreth 2 mijë euro në muaj, kapiteni rikthehet për ta ndihmuar klubin të ngjitet në Serie A

U rrit te klubi italian, Genoa, dhe premtoi se do ta mbyllë aventurën aty. Domenico Criscito ka vendosur që të kthehet në Itali te klubi i zemrës, për ta ndihmuar skuadrën që të rikthehet në Serie A.

Mbrojtësi 36-vjeçar do të jetë një afrim i Genoa-s në këtë afat kalimtar të janarit, i cili do t’i bashkohet kuqebluve menjëherë pasi prishi kontratën me klubin kanadez, Toronto.

Ajo që bie në sy është paga që Criscito do të përfitojë, e cila është vetëm 2 mijë e 274 euro në muaj, ose aq sa është minimumi i lejuar nga federata, për një futbollist profesionist në Itali.

Kjo dëshmon edhe njëherë dashurinë e Criscitos për Genoa-n, pasi mbrojtësi rikthehet për të dhënë kontributin e tij kundrejt një shpërblimi minimal, me synimin që të ndihmojë klubin të rikthehet elitën e futnollit italian.

Tashmë 36-vjeçar, Criscito është rritur te të rinjtë e Genoa-s dhe gjatë karrierës së tij ka veshur fanellën kuqeblu për më shumë se 10 sezone në periudha të ndryshme, duke mbajtur madje edhe shiritin e kapitenit.

Ndërkohë, në karrierën e tij, Crisito ka luajtur edhe për Juventus-in në Serie A dhe për Zenit-in në Rusi.

Vlen të theksohet se Juventus-i kishte shpenzuar 8 milionë euro për ta transferuar nga Genoa Crisito-n, ndërsa pasi u kthye për herë të dytë atje, Zenit e bleu për 15 milionë euro.

Crisito gjithashtu numëron edhe 26 ndeshje zyrtare me kombëtaren e Italisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.