Politikani nga Omani ofron 1 milion dollarë për ‘mantelin’ e Messi-t

Lionel Messit i janë ofruar 1 milion dollarë për ‘mantelin’ (Bisht – sipas vendasve arab) që veshi teksa ngriti Kupën e Botës nga një deputet i parlamentit të Omanit, i cili shpreson ta mbajë atë në Lindjen e Mesme.

Ikonës së futbollit iu dha veshja nga Gianni Infantino për ta prdorur në momentin historik në shenjë nderi, por lëvizja u kritikua nga lojtarë si Gary Lineker dhe Pablo Zabaleta, të cilët ishin të pakënaqur që shiritat e famshëm bardheblu të Argjentinës u mbuluan.

Imazhi i Messi-t që mban lart trofeun e Kupës së Botës për herë të parë është një nga më ikonikët në historinë e sportit.

Ajo është veshje tradicionale në Lindjen e Mesme, e zbukuruar me ar dhe vishet për raste të veçanta si dasma. Bisht-i iu dorëzua yllit të PSG-së në shenjë respekti për gjithçka që kishte arritur në turneun në Katar dhe në futboll në tërësi.

Tani, avokati dhe deputeti nga Omani, Ahmed Al Barwani, i ka ofruar Messi-t një shumë të konsiderueshme për të, pasi ai kërkon të mbajë një pjesë të rëndësishme të historisë arabe në Lindjen e Mesme.

Duke shkruar në Twitter ai tha se “Nga Sulltanati i Omanit ju përgëzoj për fitimin e Kupës së Botës Katar 2022 … bisht arab, një simbol i kalorësisë dhe mençurisë. Unë po ju ofroj 1 milion dollarë në këmbim të atij bisht-i”.

Hassan Al Thawadi, sekretar i përgjithshëm i komitetit organizues të turneut të Katarit, vlerësoi Kupën e Botës si një “festë rajonale” dhe jo vetëm e Katarit.

“Është një fustan për një rast zyrtar dhe i veshur për festime”, tha ai për BBC Sport. “Kjo ishte festë e Messi-t. Kupa e Botës pati mundësinë t’i tregojë botës kulturën tonë arabe dhe myslimane. Kjo nuk kishte të bënte me Katarin, ishte një festë rajonale”.

“Njerëz nga sfera të ndryshme të jetës mundën të vinin, të përjetonin atë që po ndodhte këtu dhe të kuptonin se ne mund të mos shohim sy më sy në gjithçka, por prapë mund të festojmë së bashku”, vijoi ai.

Lëvizja për t’i dhënë bisht-in Messi-t ka të ngjarë të vazhdojë të ndajë opinionet, megjithatë është e qartë se kjo do të thoshte shumë për ata që banonin në Lindjen e Mesme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.