Policia e Kosovës ka zhvilluar një aksion në objektet e “Postës së Serbisë”, në Veri, pas informatës së pranuar nga Autoriteti Rregullativ i Komunikimeve Elektronike dhe Postare (ARKEP), se në Kosovë operojnë operatorë ekonomik pa licencë dhe që nuk janë të regjistruar në Agjencinë për Regjistrimin e Bizneseve (ARBK).
Lajmin për Albanian Post e ka konfirmuar zëvendësdrejtori i Policisë për rajonin e Veriut, Veton Elshani.
“Pas një shkrese/informate të pranuar nga ARKEP, se në territorin e Kosovës operojnë operatorë ekonomik pa licencë dhe të pa regjistruar në ARBK, njësitë policore kanë shkuar për verifikim të këtij informacioni”, ka thënë Elshani.
Ai njoftoi se ky informacion “rezultoi te jetë i saktë me ç‘rast Policia ka njoftuar Prokurorin e Shtetit dhe tutje vazhdojmë sipas autorizimeve te tij”.
Pas aksionit policia kishte njoftuar se është konfiskuar një sasi e konsiderueshme e parave, përkatësisht rreth 1 milion e 600 mijë euro dhe 74 milionë e 700 mijë dinarë në funksion të “vendosjes së rendit dhe ligjshmërisë” në këtë zonë.
Në këtë aksion përveç policisë të pranishëm kishin qenë edhe zyrtarë të EULEX-it.
Pas këtij aksioni kishte reaguar edhe “Banka Postare Kursimore” e Serbisë.
Në një komunikatë për media, banka në fjalë, kishte thënë se përkundër “ndalimit të përkohshëm” të funksionimit të degëve në Veri të Kosovës, klientët mund të kryejnë të gjitha shërbimet bankare në degët më të afërta, të cilat ndodhen në vendkalimet kufitare me Kosovën: Jarinjë, Bërnjak, Merdare dhe Konçul.
Sipas tyre mjetet e të gjitha klientëve janë të sigurta dhe nuk do të dëmtohen.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
