Policia e Kosovës shpall në kërkim Noizyn

Policia e Kosovës e ka shpallur të hënën në kërkim reperin e mirënjohur shqiptar, Rigels Rajku, që njihet me emrin skenik Noizy. Ai dyshohet për lëndim të rëndë trupor. Policia e Kosovës ka kërkuar ndihmë nga qytetarët e vendit për lokalizimin dhe arrestimin e reperit shqiptar.

“Policia e Kosovës kërkon nga qytetarët e Republikës së Kosovës që kushdo që ka informacion për vendndodhjen e personit të dyshuar në foton e bashkangjitur, të lajmërojë Policinë e Kosovës apo të lajmërohet në stacionin më të afërt policor”, thuhet në njoftimin e Policisë së Kosovës.

Noizy, ndër artistët më të njohur në Kosovë e Shqipëri, kërkohet për veprën penale lëndim i rëndë trupor. Ai dhe individë të tjerë dyshohen se rrahën brutalisht dy persona në një diskotekë në Pejë. Gjithashtu, autoritetet kosovare e kanë shpallur në kërkim edhe një person tjetër.