Shqipëria

Policia arreston Xhelal Rrajën, akuzohet për grup të strukturuar kriminal


Policia e Shtetit ka bërë me dije se ka arrestuar Xhelal Rrajën, i shpallur në kërkim pasi gjykata i kishte caktuar masën e sigurisë “Arrest në burg”.

Prangosja e tij vjen në kuadër të operacionit “Revanshi”, për pjesëmarrje në grup të strukturuar kriminal dhe për sigurim të kushteve për të kryer vrasje.

Rikujtojmë se Rraja ishte në kërkim pas ngjarjes së rëndë të ndodhur vitin e shkuar ku u dhunuar barbarisht shtetasit Bilbil Maja dhe Jashar Maja në një lokal në aksin rrugor Fushë Krujë-Thumanë.

Asokohe Policia e Shtetit i pati bërë thirrje shtetasve Xhelal Rraja dhe Rexhep Rraja – si organizatorë të kësaj ngjarje të rëndë kriminale – për t’u dorëzuar sa më parë në Policinë e Shtetit së bashku me personat e tjerë të shpallur në kërkim.

Gjithashtu Rraja akuzohet për sigurim të kushteve dhe mjeteve materiale për të kryer vrasje në dëm të Arben Ndokës.

Sipas planit të zbuluar, Ndoka do të vritej gjatë ngushëllimit të vdekjes së një gjyqtari.

Operacioni  Revanshi u zhvillua në datat 17 dhe 18 maj të këtij viti, ku një pjesë e mirë e personave që morën urdhër arrestet nuk ndodhen në Shqipëri.

Emrat dhe rolet e tyre dolën në skenë, pas zbërthimeve të aplikacioneve Sky ECC dhe Encro Chat.

SPAK goditi shtatë grupe kriminale në një hetim që u mundësua falë ndihmës së vendeve partnere si dhe institucioneve Eurojust dhe Europol.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore