Policia Rrugore ka zhvilluar një aksion të madh në vend gjatë javës, ku ka bërë me dije se ka arrestuar 45 shoferë dhe janë pezulluar në tërësi 109 leje drejtimi.
Në bazë të njoftimit zyrtar, nisur nga shtimi i fluksit të automjeteve, kryesisht drejt zonave bregdetare, turistike dhe qendrave tregtare e urbane, si dhe bazuar në analizën e detajuar të shkaqeve të ngjarjeve rrugore, Policia Rrugore në të gjithë vendin ka marrë një sërë masash shtesë, me qëllim rritjen e parametrave të sigurisë rrugore.
Në të gjitha akset nacionale dhe qendrat e mëdha urbane janë intensifikuar monitorimet me mjetet inteligjente, radarët automatikë, me kamera dhe me patrulla të lëvizshme me mjete të paloguara.
Gjatë kësaj jave, në të gjithë vendin, si rezultat i monitorimit, nga shërbimet e Policisë Rrugore, janë evidentuar dhe arrestuar në të gjithë vendin, 45 drejtues mjetesh, për drejtim mjeti në gjendje të dehur, pa leje drejtimi apo në efektin e lëndëve narkotike.
Janë pezulluar 109 leje drejtimi, kryesisht për shpejtësi tej normave të lejuara dhe për drejtim mjeti në efektin e alkoolit apo të lëndëve narkotike.
Janë goditur nga Policia Rrugore e Tiranës, 4 raste të tentativës për të korruptuar punonjësit e Policisë Rrugore, nga drejtuesit e automjeteve, me qëllim shmangien e masës administrative për shkeljen e kryer.
Në të gjithë vendin janë evidentuar dhe ndëshkuar me masë administrative gjithsej 27 mijë e 377 drejtues automjetesh dhe motomjetesh, për shkelje të ndryshme, nga këto:
-1 mijë e 254 drejtues automjetesh që përdornin celularin gjatë drejtimit të automjetit;
-7 mijë e 845 drejtues automjetesh që qarkullonin me shpejtësi tej normave të lejuara, por pa masën plotësuese pezullim i lejes së drejtimit;
-1 mijë e 516 drejtues automjetesh, për mosvendosje të rripit të sigurimit;
-13 mijë e 543 drejtues automjetesh, për parkime të gabuara;
-351 drejtues motomjetesh, për mosvendosje të kaskës mbrojtëse.
-2 mijë e 306 drejtues mjetesh janë ndëshkuar për parkim të gabuar.
-562 për shkelje të tjera të Kodit Rrugor.
Policia apelon për të gjithë përdoruesit e rrugës, që të zbatojnë me rigorozitet rregullat e qarkullimit rrugor, pasi të gjitha rrugët monitorohen nga mjetet inteligjente dhe patrullat e lëvizshme të Policisë Rrugore.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
