Nga vlera e koeficientit prej 105 euro e cila është publikuar të mërkurën nga Qeveria e Kosovës dëmtohet edhe Policia e Kosovës.
Për këtë arsyeje nga ky institucion është thënë se do të ndërmarrin veprime për të shfuqizuar një ligj të tillë.
Kryetar i Sindikatës së Policisë së Kosovës, Imer Zeqiri, në një bisedë për Albanian Post një vlerë të tillë e ka quajtur “si të papritshme” dhe “aspak të pranueshme”.
“Një vlerë e tillë e koeficientit nuk ka qenë aspak e pritshme dhe është i papranueshëm për sindikatën e Policisë. Një kategori e punonjësve kemi zbritje të pagave në mënyrë automatike me ketë vlerë të koeficientit dhe aty ku ka zbritje policët nuk mund të jenë të kënaqur me një vlerë të tillë”, ka thënë Zeqiri për Albanian Post.
Në bashkëpunim me sindikatat e tjera, ai deklaron se do të kundërshtoj një vlerë të tillë.
“Sigurisht që kjo vlerë do të kundërshtohet. Fillimisht do të konsultohemi me aktivistët dhe këshillin drejtues si dhe bisedime do të kemi edhe me sindikatat e tjera dhe do ta kundërshtojmë një vlerë si kjo”.
“Ne do të koordinohemi edhe me sindikatat e tjera për ta dërguar Ligjin në Gjykatën Kushtetuese, por nëse jo atëherë ligjin do ta dërgojmë edhe në mënyrë individuale, por mirë do të ishte që të kundërshtohemi të gjitha sindikatat bashkë”.
Zeqiri, sqaron se kjo vlerë shihet pozitive vetëm nga ana e publikut, por në realitet është në dëmtim të këtij sektori.
“Në sytë e opinionit shihet një rritje për policët por në fund të muajit në realitet polici nuk do të marrë pagë më të madhe sesa që ka marrë deri tani apo do të jetë një rritje shumë e lehtë rreth 20-30 euro dhe kjo është pakënaqësi jashtëzakonisht e madhe”.
Për nëntë mijë të policëve të Kosovës nuk ka as sigurime shëndetësore dhe jetësor.
Edhe pse në secilat palë zgjedhje premtohet për sigurime shëndetësor dhe jetësore të pjesëtarëve të Policisë së Kosovës, një gjë e tillë nuk ka ndodhur akoma.
Nga 120 sa ishte vlera e koeficientit për paga në sektorin publik, Qeveria e Kosovës me Ligjin e ri e ka ulur në 105, çka nënkupton paga më të vogla për rreth 80 mijë punonjës të administratës së shtetit në të gjithë sektorët.
Çfarë është koeficienti?
Pagat në sektorin publik merren sipas koeficientit që është i ndarë për pozita të caktuara.
Nëse vlera e 1 koeficienti është 105 euro, atëherë paga e një punëtori shumëzohet mes kësaj vlere dhe numrit të koeficientit.
Nëse pozita e caktuar ka koeficientin 5, atëherë paga është 5 x 105, e kështu me radhë.
Paga më e lartë do të jetë ajo e presidentit me koeficientin 18, apo 1 mijë e 890 euro.
Kryetari i Gjykatës Kushtetuese do të ketë koeficient 17.5 ndërsa 17 do të jetë koeficienti për postin e kryeparlamentarit dhe kryeministrit.
Deputetët dhe ministrat do të kenë pagë të barabartë, me koeficient 16.4.
Sa i përket kryetarëve të komunave, ai i kryeqytetit do të ketë pagë me koeficient 15, ndërsa pagat e të tjerëve do të dallojnë varësisht prej numrit të qytetarëve që kanë ato komuna.
Paga për kryetarin e Gjykatës Supreme do të jetë në koeficientin 17, kurse koeficienti te gjyqtarët do të sillet prej 15.5 deri në 12 për gjyqtarin e Themelores dhe të dhomës së shkallës së parë të Komerciales.
Në Prokurori, paga e kryeprokurorit do të jetë me koeficientin 17, ndërsa prokurorët e përgjithshëm në Themelore do të kenë pagë me koeficient 12.
Koeficientin 15 e ka komandanti i Forcës së Sigurisë së Kosovës, ndërsa 14.5 e ka drejtori i Përgjithshëm i Policisë.
Sipas Ligjit për buxhetin e vitit 2023, i miratuar po ashtu në dhjetor të vitit të kaluar, buxheti i përgjithshëm për paga në sektorin publik do të jetë 745 milionë euro.
Vlera e koeficientit ishte mbajtur e fshehur për një kohë shumë të gjatë asnjëri prej punëtorëve në sektorin publik nuk ishte informuar se sa do ta ketë pagën.
Nga secila kategori kishin thënë për Albanian Post se vlerën e koeficientit e presin që të jetë 130 euro, nëse kjo vlerë do të ishte më e ulët të njëjtit kanë paralajmëruar protesta.
Barazi në varfëri, Qeveria e ulë vlerën e koeficientit të pagave për rreth 80 mijë vetave
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
