Piktura e sapo vërtetuar e Caravaggio-s po shfaqet në Madrid

Një pikturë e vërtetuar rishtazi nga artisti i famshëm i shekullit të XVII-të Caravaggio po shfaqet në muzeun Prado në Madrid.

“Ecce Homo”, e cila tregon guvernatorin romak Ponc Pilatin që prezanton Krishtin para njerëzve, është një nga rreth 60 veprat e njohura të mjeshtrit italian.

Por vepra thuajse i shpëtoi vëmendjes së botës së gjerë të artit, pasi fillimisht i atribuohej një artisti më të vogël.

U tërhoq nga shitja me urdhër të qeverisë spanjolle në vitin 2021, disa orë përpara se të shitej në ankand për një çmim hapjeje prej 1 mijë e 500 euro.

Tani, tre vjet pas asaj ndërhyrjeje vendimtare, vepra po ekspozohet për herë të parë që kur u konfirmua statusi i vërtetë.

Në fillim të këtij muaji, Prado ka njoftuar se piktura ishte “pa dyshim, një kryevepër e Caravaggio-s”, duke e quajtur atë |një nga zbulimet më të mëdha në historinë e artit”.

Caravaggio, i cili vdiq në vitin 1610 në moshën 38-vjeçare, ishte i njohur për përdorimin e tij dramatik të dritës dhe hijes për të sjellë realizëm të thellë psikologjik në skenat e dhunshme që ai përshkruante përgjithësisht.

Historianët e artit e kanë përshkruar punën e tij si fillimin e pikturës moderne.

“Ecce Homo” besohet se i përkiste koleksionit privat të mbretit spanjoll Philip IV, përpara se të ekspozohej në apartamentet e djalit të tij, Charles II.

U rishfaq në Madrid në prill 2021, kur u përshkrua si produkt i një artisti që i përkiste rrethit të piktorit spanjoll të shekullit të XVII-të, José de Ribera.

Por pasi ekspertët në Prado shprehën dyshimet e tyre për autorësinë e vërtetë të pikturës dhe Ministria spanjolle e Kulturës ndërhyri për të bllokuar shitjen.

Piktura do të ekspozohet deri në tetor në një ekspozitë të veçantë të njëhershme pas një marrëveshjeje me pronarin e saj të ri, që besohet të jetë një shtetas britanik që jeton në Spanjë.

Pas kësaj, kanavaca do të kalojë në koleksionin e përhershëm të Prado për katër muaj të tjerë.

Referuar raporteve të mediave spanjolle, piktura ndryshoi duart për 36 milionë euro.

Jorge Coll, drejtuesi i galerisë së artit në Londër, Colnaghi, e cila menaxhoi shitjen, ka thënë se piktura do të mbetej në huazim në koleksionet publike, në vend që të përfundonte në shtëpinë e pronarit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.