Petkoviç: “Është gënjeshtër që s’paguhet rryma në veri”

Drejtori i Zyrës për Kosovën në qeverinë serbe, Petar Petkoviç, ka thënë se kryeministri i Kosovës, Albin Kurti, tentoi që “të shtrojë një tezë të rrejshme se kinse rryma në veri të Kosovës s’paguhet për vite”.

Ai ka thënë se për këtë çështje faktet flasin të kundërtën.

“Absolutisht çdo kilovat rrymë e konsumuar gjatë gjithë këtyre viteve është paguar siç duhet, sepse Beogradi zyrtar dhe EPS kanë paguar energjinë elektrike që ka ardhur në katër komuna në veri të Kosovës përmes sistemeve të transmetimit EMS deri në fillim të vitit 2021”, ka thënë ai, shkruan RTS.

“Pra, bëhet fjalë për energjinë elektrike të Republikës së Serbisë, përmes së cilës Beogradi e furnizoi veriun e Kosovës, që nga momenti kur Prishtina para një dekade ia ndërpreu furnizimin me energji elektrike veriut, gjë që mund të çojë në një katastrofë humanitare”.

Petkoviç thotë se institucionet e Kosovës e kanë përgjegjësinë për situatën e krijuar meqë “refuzojnë vazhdimisht që t’i lëshojnë licencën për furnizim me energji elektrike kompanisë Electrosever”.

Ai shtoi se Prishtina ka refuzuar as ta diskutojë këtë çështje gjatë raundeve të fundit të dialogut në Bruksel.

Qytetarët e pjesëve të tjera të Kosovës kanë paguar me vjet për rrymën e shpenzuar në veri, ndërsa nga viti 2017, borxhet e asaj pjese janë paguar nga buxheti i Kosovës.

Ashtu si edhe qeveritë e kaluara, edhe qeveria Kurti ka ndarë buxhet nga arka e shtetit të Kosovës për të paguar faturat e konsumuara të energjisë elektrike për banorët e katër komunave me shumicë serbe në veri të Kosovës.

Më 28 dhjetor të vitit të kaluar, Gjykata Kushtetuese, ka marrë vendim për rastin e pagesës së 11 milionë eurove për shpenzimet e rrymës në veri, vendim ky që ishte miratuar në Kuvendin e Kosovës më 6 maj të vitit 2021.

Kushtetuesja ka thënë se ai akt ka rezultuar në dallim të trajtimit të konsumatorëve të energjisë elektrike që nuk jetojnë në katër komunat në veri, ajo ka shtuar se ky dallim në trajtim ka një “justifikim objektiv dhe është i arsyeshëm” dhe rrjedhimisht nuk rezulton me diskriminim.

“Për pasojë, dhe përfundimisht, Gjykata konstatoi se nxjerrja e Aktit të kontestuar të Kuvendit ka rezultuar në dallim në trajtim të konsumatorëve të energjisë elektrike që nuk jetojnë në katër (4) komunat e Republikës së Kosovës, megjithatë, ky dallim në trajtim ka një “justifikim objektiv dhe të arsyeshëm”.

Ndërsa shtoi se, “nuk rezulton në diskriminim, sepse (a) është i përcaktuar me ligj; (b) ka ndjekur një qëllim legjitim; dhe (c) është proporcional, dhe për pasojë, nuk është nxjerrë në papajtueshmëri me nenet 24 dhe 55 të Kushtetutës në lidhje me nenin 1 të Protokollit nr.12 të Konventës Evropiane për të Drejtat e Njeriut”, thuhet në vendimin e Gjykatës Kushtetuese.

Kuvendi kishte autorizuar KOSTT-in që të mbulojë devijimet e energjisë elektrike në katër komunat veriore të Kosovës, duke shfrytëzuar të hyrat nga buxheti vetanak, mjete këto të cilat do të kompensoheshin “nga dividendë apo ndonjë mekanizëm tjetër i mundshëm”.

Me gjashtë maj të vitit të kaluar, me 61 vota për, asnjë kundër dhe asnjë abstenim, Kuvendi i Kosovës kishte miratuar rekomandimet e Komisionit Parlamentar për Ekonomi, Industri Ndërmarrësi, dhe Tregtisë, që t’iu alokohen mjetet financiare dhe përgjegjsitë, që Operatori i Sistemit, Transmisionit dhe Tregut – KOSTT, të bëjë pagesën e faturave të energjisë elektrike për serbët që jetojnë në katër komunat veriore të Kosovës.

Artane Rizvanolli, Ministre e Ekonomisë e kishte arsyetuar propozimin se duhet të “respektohen marrëveshjet e arritura më herët”, dhe se “qeveria po diskuton me KOSTT-in, ZRRE-në dhe departamentet përkatëse brenda ministrisë për hartimin dhe arritjen e marrëveshjes brenda gjashtë muajve me “Elektro Severin”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.