Shqipëria

Përtej vulës, pikëpyetjet e Partisë Demokratike


Tashmë është fakt i kryer, beteja prej më shumë se dy vitesh në dyert e Gjykatave për të përcaktuar se kush e përfaqësonte zyrtarisht Partinë Demokratike (PD) ka marrë fund.

Ishte Gjykata e Apelit, ajo e cila vendosi të lërë vulën në duart e Sali Berishës, duke mos pranuar ankimimin e bërë nga fraksioni i drejtuar nga Lulzim Basha.

Apeli – me fjalë të thjeshta – la në fuqi vendimin e shkallës së parë i cili njohu Kuvendin e thirrur nga ish-kryeministri dhe mbështetësit e tij, në dhjetor të vitit 2021.

Reagimet mbi vendimin ishin të ndryshme: diku ra heshtja, diku tupanat, dhe diku pranimi.

Mbështetësit e Berishës mësynë në selinë e PD-së me këngë dhe valle.

Lulzim Basha, pas mbledhjes së krerëve të degëve tha se është hedhur ideja e rekursit në Gjykatën e Lartë.

“Unë ndihem demokrat dhe si demokrat bashkë me kolegët e mi, kemi një përgjegjësi ndaj atyre që këtë betejë e bëjnë për vlerat e demokratëve, jo për vulë, karrige, as logo. Ky është një moment, edhe për ata që konspiracionet që u kanë shitur se ky ka qenë bashkëpunim mes Ramës dhe PD, s’ka dhe s’ka patur kurrë një bashkëpunim të tillë”.

Enkelejd Alibeaj dhe Kreshnik Çollaku – fraksioni i Bashës – theksuan se do të respektojnë vendimin dhe se ato mbeten deputetë të selisë blu.

Por pavarësisht reagimeve pikëpyetjet mbeten aty: sfidat e PD-së, reformimi i saj, lëvizjet e reja dhe fuqizimi politik.

Të paktën kështu mendon analisti Lutfi Dervishi, i cili thekson se çfarëdo lloj vendimi që të merret nga politikanët kryesorë, sfida dhe çështja për PD-në sot është paraqitja si një alternativë e re, me figura të reja, pa ngarkesa me të shkuarën, që do të krijonin një lloj imazhi dhe perceptimi tjetër të PD-së në elektoratin shqiptar.

“E përpjeta është përpara, dhe nuk është arritur në majë për shkak se PD është e fraktuar nga kriza e brendshme. Ka forca të reja që kanë dalë në skenë. Jemi vetëm një vit larg zgjedhjeve parlamentare dhe problem i zotit Berisha mbetet; ai është në arrest shtëpie dhe nën hetim. Kështu që përtej momentit të parë që hiqet një lloj konfuzioni, sfida mbetet se çfarë do të bëjë zoti Basha”, thotë Dervish në një prononcim për “Zërin e Amerikës”.

Sa i takon fatit të Bashës – ai do të ketë plot pesë ditë për të bërë rekurs në Gjykatën e Lartë.

Por, analisti Mero Baze shkruan se Basha duhet ta shohë heqjen e vulës si një shpëtim dhe shans të ri për të.

Kjo – pasi sipas tij – vula do ta bënte atë më të dobët politikisht, ama më komod për fushatë elektorale.

“Heqja padrejtësisht e vulës e viktimizon atë, hedh poshtë gjithë gënjeshtrat e Sali Berishës për bashkëpunim të tij me Edi Ramën, të cilat tani duhet t’i mbajë ai në kurriz, dhe i krijon një mundësi të re për një betejë në politiken shqiptare”.

Krejtësisht një mendim tjetër ka analisti Kreshnik Spahiu, i cili e ka quajtur të gjithë situatën një lojë mes palëve.

“Shqiptarët duhet të kuptojnë lojën Basha-Berisha”, thotë ai, duke shtuar se lufta mes Bashës dhe Berishës ishte një teatër për të mashtruar amerikanët.

“Skenar që filloi pas shtatorit 2021, kur SHBA-të detyruan Bashën të përjashtonte nga politika dhe partia Berishën, pasi ai ishte shpallur familjarisht non grata. Të gjendur përballë kësaj situate Basha dhe Berisha vendosën të zhvillojnë një lojë luftash për t’u rikthyer pas tre vitesh si fitimtarë, për të kthyer vulën, partinë, në emër të gjykatës, shumicës”.

Argumentin e tij, Spahiu e mbështet me faktin se SHBA-të prej një viti kanë qëndruar indiferent dhe izoluan Bashën nga agjenda diplomatike.

Ai parashikon se grupi i Bashës do shpërbëhet dhe gjysma do kalojnë te Berisha.

Analistët bien dakord në një pikë: nuk është koha për festë.

Drejtuesi i institutit të studimeve politike, Afrim Krasniqi, shprehet se nuk ka asnjë arsye për entuziazëm.

“Opozita është e pareformuar, e papërfaqësuar, e paorganizuar dhe është shumë larg qenies së një partie konkurruese për zgjedhjet e ardhshme parlamentare”.

Krasniqi edhe pse i vendos të gjithë skenarët në tavolinë – krahu i Bashës të krijojë një parti të re politike dhe krahu i drejtuar nga Berisha të administrojë pushtetin si parti e madhe e opozitës – thekson se të dyja të ndara apo të bashkuara nuk arrijnë dot të formësojnë një opozitë konstruktive, reformatore dhe proeuropiane për të cilën ka nevojë Shqipëria.

Për analistët pak, por i sigurtë është fakti se më pranë perëndimit nuk mund të jesh më një udhëheqje nga dritarja e shtëpisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore