Gjendja shëndetësore e 23-vjecares e cila ishte lënduar nga rënia e kulmit në Prishtinë, është përmirësuar.
Ajo të hënën është transferuar në Klinikën e Neurokirurgjisë për trajtim të mëtutjeshëm.
Lajmin e ka bërë të ditur deputeti i Listës Guxo, Haxhi Avdyli, i cili ka vizituarën qytetaren e lënduar të martën në klinikë.
“Pas qëndrimit në mjekim intensiv dhe pas operacionit gati 4 orë për të evakuar e ndalur gjakderdhjen intrakraniale, Elza ia doli. Nga dje ajo është transferuar në Klinikën e Neurokirurgjisë për trajtim të mëtutjeshëm”, ka shkruar Avdyli në rrjetin social ‘Facebook’.
Teksa, ka shtuar se nga qëndrimi në aparaturë dhe gjendja e saj ku mbahej me barna, ajo tashmë është e vetëdijshme.
“Ajo është e vetëdijshme, komunikatave, e lëvizshme me të gjitha ekstremitetet, përkundër që ka thyerje në para krah dhe ne vertebrën cervikale C7”.
23 vjeçarja deri tani ishte mbajtur në Klinikën e Mjekimit Intenziv, kjo për shkak të situatës së rënduar të saj dhe lëndimet që kishte pësuar nga rënia e kulmit.
Çka ndodhi?
Një person ishte lënduar pas rënies së kulmit të ndërtesës së Komunës së re të Prishtinës, të enjten e 19 janarit.
Lajmin për Albanian Post e kishte konfirmuar zëdhënësi i Policisë së Kosovës, për rajonin e Prishtinës, Agron Borovci.
“Rreth orës 13:00, është raportuar se në rrugën “Nora e Hotit” në Prishtinë, një person ka marrë lëndime si pasojë e goditjes nga materiale që janë shkëputur nga çatia e një objekti”.
“Policia menjëherë ka dalë në vendin e ngjarjes dhe mbështetur në informacionet e para është raportuar për një person të lënduar, femër, e cila është dërguar në QKUK për trajtimin e nevojshëm mjekësor”, ka thënë Borovci për AP.
Ndërsa, ishte thënë se policia ka nisur hetimet për të zbardhur rrethanat që dërguan deri tek ky rast.
Kulmi i objektit të ri të Komunës së Prishtinës është cilësuar se nuk është ndërtuar në bazë të standardeve të ndërtimit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com