Ka përfunduar ditën e sotme më 6 gusht trajnimi për 28 hetuesit e Byrosë Kombëtare të Hetimit.
Ata do të fillojnë zyrtarisht punën të hënën e 9 gushtit.
Në ceremoninë e dorëzimit të detyrës ishin të pranishëm kreu i SPAK-ut, Arben Kraja, si dhe drejtuesja e BKH-së, Aida Hajnaj.
Ecuria e përzgjedhjes
Komisioni i Përzgjedhjes në BKH ka mbyllur më 1 gusht fazën e intervistës dhe përzgjedhjes së kandidatëve për hetues në fazat e mëtejshme të konkurrimit.
Në qershor, BKH-ja mbylli procesin e Testimit për Aftësitë Fizike, për kandidatët “hetues”.
“Nga 325 kandidatë pjesëmarrës, u kualifikuan 210 kandidatë dhe 115 kandidatë nuk kaluan në fazën tjetër”, njofton BKH-ja.
Testimi i Aftësive Fizike u zhvillua nën vëzhgimin dhe monitorimin e Komisionit Ndërkombëtar të Ekspertëve, caktuar nga misionet e qeverisë së Shteteve të Bashkuara të Amerikës dhe Bashkimit Evropian në Shqipëri.
Kandidatët e kualifikuar, më datë 15 qershor 2021, iu nënshtruan testit të esesë me shkrim.
BKH-ja e shpalli garën për 32 hetues në këtë institucion më 6 prill.
Kandidatët e kualifikuar iu nënshtruan një sërë modulesh vlerësimi dhe trajnimesh që duhen kryer përpara se të certifikohen.
“Rrugëtimi i tyre filloi me procesin e përzgjedhjes gjatë muajit tetor 2020 dhe ka përfshirë teste të logjikës së arsyetimit, testin fizik, hartimin e esesë, intervistën e strukturuar, si dhe një verifikim të gjerë të figurës”, shkruhet në njoftimin e SPAK-ut.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
