Përfundon takimi i komitetit për menaxhim të pandemisë, rekomandohen masat e reja

Mëngjesin e së enjtes ka përfunduar mbledhja e Komitetit për koordinim dhe vlerësimin e situatës epidemiologjike lidhur me situatën me COVID-19 në Kosovë.

Siç edhe është paralajmëruar, në këtë takim ku kanë marrë pjesë Ministri i Shëndetësisë, Rifat Latifi, ajo e arsimit Arbërie Nagavci dhe ai i Brendshëm, Xhelal Sveçla është diskutuar mundësia për vendosjen e masave të reja pas rritjes enorme të rasteve me COVID-19.

Latifi, pas takimit ka thënë se masat do të rishikohen dhe se ende janë duke u diskutuar.

Ai nuk ka dhënë detaje nëse gjithçka do të mbyllet në orën 22:00, siç ishte raportuar.

“Në takim është diskutuar veçanërisht për masat anti-COVID dhe për përhapjen e virusit. Kosova qëndron më mirë sesa vendet e rajonit. Rekomandimet pritet t’i dërgohen Qeverisë sot në mbrëmje apo nesër në mëngjes”, ka thënë Latifi.

Ndërkaq, ministrja e Arsimit, Arbërie Nagavci, ka thënë se shteti ka interesim që t’i mbajë shkollat hapur, pavarësisht rritjes së rasteve pozitive te fëmijët. Ajo ka bërë të ditur se sot gjatë ditës do të mblidhet task-forca e kësaj ministrie për të diskutuar për situatën e krijuar dhe nesër prapë do të ketë takim.

Rekord shifrash në Kosovë, 2 mijë e 50 raste të reja me COVID-19

Gjendja pandemike në vend të mërkurën ka tejkaluar rritjet e trendit duke dyfishuar numrin e të infektuarve brenda 24 orëve, ku janë regjistruar 2 mijë e 50 raste pozitive me COVID-19.

Trendi i rritjes së numrit të të infektuarve pas datës pesë janar ka shënuar rritje të vazhdueshme.

Sipas MSH-së varianti Omicron është mbizotërues në vend, andaj ky institucion ka bërë thirrje qytetarëve që të vaksinohen kundër COVID-19 me dy dozat e para, por edhe me dozën përforcuese.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.