Përfundon mbledhja e nënshkrimeve për largimin e kryetarëve shqiptarë në Veri

Nënshkrimi i peticioneve për shkarkimin e kryetarëve shqiptarë në katër komuna në Veri të Kosovës, ka përfunduar.

Lajmin e ka konfirmuar Darko Vuksanoviç, për Radio Evropën e Lirë i cili ka thënë se janë mbledhur nënshkrime të mjaftueshme.

Sërgjan Vuçiniç, njëri nga inicatorët në Mitrovicën e Veriut, ka thënë po ashtu se procesi i nënshkrimeve ka përfunduar.

Të shtunën, më 20 janar, janë mbledhur nënshkrime të mjaftueshme edhe në komunën e Leposaviqit.

Më 19 janar, në Mitrovicën e Veriut, janë mbledhur edhe nënshkrimet e nevojshme të peticionit për të shkarkuar kryetarin e komunës nga radhët e komunitetit shqiptar, Erden Atiq.

Pas dorëzimit të peticionit me nënshkrime, kryetari i kuvendit ka tre ditë kohë për t’ia përcjellë Komisionit Qendror të Zgjedhjeve (KQZ) për shqyrtim dhe verifikim.

Nëse KQZ-ja konfirmon se nënshkrimet e mbledhura janë aq sa kërkohet dhe i verifikon ato, më pas organizohet votimi për shkarkimin e kryetarit, i cili duhet të mbahet brenda 45 ditësh.

Që ky votim të jetë i suksesshëm, duhet 50 për qind, plus një votë e qytetarëve me të drejtë vote.

Pas kësaj, rezultati i dërgohet presidentes së Kosovës, Vjosa Osmani, e cila ka afat ligjor prej 30 deri në 45 ditë për të shpallur mbajtjen e zgjedhjeve të parakohshme.

Kryetarët shqiptar u zgjodhën në prill të vitit 2023 në zgjedhjet të cilat u bojkotuan nga serbët në shenjë pakënaqësie me politikat e Qeverisë së Kosovës.

Nisja e detyrës së tyre nxiti tensione në fund të majit të vitit 2023, të cilat kulmuan në Zveçan, pasi protestuesit serbë u përleshën me pjesëtarët e misionit paqeruajtës të NATO-s në Kosovë, KFOR.

BE-ja kishte kërkuar uljen e tensioneve dhe shpalljen e zgjedhjeve të reja në katër komunat në Veri të Kosovës.

Mblidhen nënshkrimet për shkarkimin e Atiq-it

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.