Lajme

Përfundon aksioni “Brezovica 3” – arrestohet një doganier dhe kryetari i bordit të “Ski Center Brezovica”


Brezovica.

Aksioni “Brezovica 3”, i zhvilluar të mërkurën e 16 marsit ka përfunduar.

Pas bastisjes së shtatë lokacioneve të ndryshme në Shtërpcë janë arrestuar një doganier dhe kryetari i Bordit të “Ski Center Brezovica”.

Këtë e ka bërë të ditur Prokuroria e Ferizajit, duke sqaruar se të dyshuarit janë në ndalim policor prej 48 orësh.

“Prokuroria Themelore në Ferizaj, njofton opinionin publik se në bashkëpunim me Policinë e Kosovës, Drejtoria për Hetimin e Krimeve të Rënda (DHKR) në Prishtinë, në bazë të urdhëresës së lëshuar nga Gjykata Themelore në Ferizaj për kontrollin e shtëpive dhe objekteve përcjellës, sot kanë realizuar aksionin “Brezovica”.

“Ku, me ç’rast janë kontrolluar dhe bastisur shtatë lokacione të ndryshme në Shtërpcë, në mesin e tyre edhe objekti i Komunës së strukturave paralele në Shtërpcë dhe janë arrestuar dy persona të dyshuar”, thuhet në njoftim.

Njëri nga aksionet “Brezovica”.

Edhe, të enjten e tre marsit, kishte pasur aksioni për të njëjtin rast, nën dyshimin për lëshimin e lejeve ndërtimore në Parkun Kombëtar “Sharri”, në zonën e Brezovicës.

Këtë e pati bërë të ditur Prokuroria Themelore në Ferizaj përmes një komunikate për media, ku mes tjerash kishte njoftuar se janë bastisur 12 lokacione të ndryshme në katër qytete, përkatësisht, Ferizaj, Prishtinë, Skenderaj dhe Lipjan.

“Deri më tani janë arrestuar shtatë persona, tre prej tyre ish- zyrtarë të Ministrisë së Mjedisit, Planifikimit Hapësinor dhe Infrastrukturës dhe katër pronar të kompanive ndërtimore, të cilët dyshohen për keqpërdorim të detyrës zyrtare, marrje, dhënie të ryshfetit, si dhe ushtrim i ndikimit”, thuhej në komunikatë.

Që në dhjetorin e vitit të kaluar, Policia e Kosovës se bashku me Prokurorinë Themelore të Ferizajt kanë nisur aksionin “Brezovica”, ku deri tani nën pranga janë vënë rreth 30 persona, përfshirë këtu ish kryetarin e komunës së Shtërpcës, Bratislav Nikoliç, zyrtarë tjerë të kësaj komune, e po ashtu zyrtarë të lartë të Ministrisë së Infrastrukturës,  nën pranga u vënë edhe pronar të kompanive të ndryshme ndërtimore.

Prokuroria Themelore e Ferizajt ka njoftuar se personat që janë arrestuar dyshohen për keqpërdorim të detyrës zyrtare, marrje, dhënie të ryshfetit, si dhe ushtrim i ndikimit.

Aksioni “Brezovica” kishte filluar saktësisht me 21 dhjetor të vitit 2021, ku nga aksioni i parë rezultuan të arrestuar 10 persona.

Pas aksionit të 21 dhjetorit, Policia vazhdoi aksionin “Brezovicës” më datën 6 janar.

Gjatë operacionit të 6 janarit u arrestuan edhe 10 persona, ndërkaq në pranga si të dyshuar për keqpërdorim të detyrës apo autoritetit zyrtar dhe marrje të ryshfetit kanë përfunduar ish-sekretari i Ministrisë së Ambientit, Arben Çitaku dhe Bedri Halimi, kryeinspektor në këtë ministri.

/Albanianpost.com


Lajmet kryesore