Për Driton Kukën xhudistët janë “heronjtë e lirisë”

“Heronjtë e mi. Heronjtë e lirisë së fituar me gjak”, kështu i quajti Driton Kuka, xhudistët që ai i përgatiti drejt sukseseve të mëdha, të cilët po bëjnë krenar të gjithë popullin shqiptar.

Kuka përmes një postimi në faqen e tij në facebook, përkujtoi suksesin e kosovarëve në sportin e xhudos, si dhe falënderoi ata duke përkujtuar se pavarësisht se “jemi një vend i vogël, ne mund të arrijmë shumë”.

“U nis me Majlindën në Rio De Janeiro tash e 5 vite, e arta erdhi në Kosovë. Në Tokio vazhduan Distria e Nora, krejt të arta. Ende nuk më besohet, kemi ardhur për medalje, por dy të Arta e një vend i shtatë për shtetin me më pak se 2 milionë banorë”, shkroi Driton Kuka.

Në Lojërat Olimpike të Tokios, Distria Krasniqi dhe Nora Gjakova fituan medalje të arta, duke bërë Kosovën vendin e dytë sa i përket medaljeve të arta në sportin e xhudos.

Dhe padyshim, mjeshtri i gjithë këtij suksesi që ishte Toni Kuka, i cili më tej tha se jemi para shumë vendeve të cilat investojnë shuma të mëdha për të arritur majat në sport.

“Çfarë e arriture në radhitjen e shteteve me medalje të arta në sportin ku shtetet investojnë me dhjetëra e qindra miliona euro. Kosova vetëm pas Japonisë e para Francës, Rusisë, e para 200 e më shumë shteteve dhe e gjithë kjo në Lojëra Olimpike” shtoi më tutje Kuka.

Në fund Toni Kuka, falënderoi sportistët që po i udhëheqë tash e ca kohë drejt sukseseve të tyre të mëdha.

“Heronjtë e mi. Heronjtë e lirisë së fituar me gjak. Sa e sa herë jam lutur për ju në këto vite e sot shihni Kosovën ku e keni ngrit në sportin tonë të dashur. Thjesht e shkurt faleminderit nga zemra”, përfundoi trajneri i xhudistëve kosovarë.

Kujtojmë që Kosova mori pjesë për herë të dytë në Lojërat Olimpike, pas atyre të vitit 2016 në Rio.

Dhe falë xhudistëve kosovar, tani Kosova numëron tri medalje të arta olimpike.

Ndërkohë, në Olimpiadën e Tokios morën pjesë: Majlinda Kelmendi, Distria Krasniqi, Nora Gjakova, Loriana Kuka e Akil Gjakova, ku të gjithë ishin pjesëmarrës me normë olimpike të fituar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.