Davor Ivo Stier nga Partia Popullore Evropiane (EPP) është zgjedhur të hënën kryetar i delegacionit të Parlamentit Evropian (PE) për marrëdhëniet me Kosovën. Ai do të bashkëkryesojë Komisionin Parlamentar të Stabilizim-Asociimit (KPSA), që përbën marrëveshjen e vetme kontraktuale të Kosovës me Bashkimin Evropian (BE).

Steir, i cili ka qenë ministër i Punëve të Jashtme dhe Çështjeve Evropiane të Kroacisë nga viti 2016 deri në vitin 2017, ka theksuar se do të punojë drejt forcimit të perspektivës evropiane të Kosovës. Ai ka përmendur gjithashtu edhe procesin e dialogut midis Kosovës dhe Serbisë.

“Paqja, siguria, dialogu dhe normalizimi i marrëdhënieve me Serbinë, mbrojtja e të drejtave të pakicave dhe të gjithë qytetarëve të Kosovës, dhe zbatimi i rendit kushtetues në gjithë territorin e Kosovës do të jenë çështje prioritare në punën e përbashkët të Komisionit Parlamentar”.

KPSA-të janë organe të formuara në bazë të Marrëveshjes së Stabilizim-Asociimit (MSA), të cilat përbëhen nga deputetë të PE-së dhe deputetë të parlamenteve kombëtare. Zakonisht, delegacionet takohen dy herë në vit, një herë në vendin respektiv dhe një herë në PE.