PDK pas raportimit të AP-së mbi rastin Dehari: Zhdukja dhe gjetja e mostrave s’duhet të tejkalohet – autorët të vihen para drejtësisë

Rreth një javë pas raportimit të Albanian Post se janë gjetur mostrat e ish aktivistit të Lëvizjes Vetëvendosje, Astrit Deharit që ishin zhdukur gjatë vitit 2022, shefi i Grupit Parlamentar të Partisë Demokratike të Kosovës, Abelard Tahiri, i ka bërë thirrje Prokurorisë Speciale që të vihet para drejtësisë “secili zyrtar shtetëror që ka gisht në zhdukjen e provave të Deharit dhe në kthimin e pjesshëm të tyre”.

“Më 29 mars 2024 opinioni publik u informua për gjetjen e mostrave të Astrit Deharit, vdekja dhe fatkeqësia e të cilit në rrugën e zbardhjes së saj, këto tri vjetët e fundit, nën pushtetit e Albin Kurtit, u vështirësua dhe u mjegullua padrejtësisht dhe në mënyrë misterioze. Zhdukja e mostrave, gjetja e pjesshme apo e plotë e tyre, për secilin rast, është përgjegjësi e institucioneve shtetërore dhe nuk mund të tejkalohet me lehtësi sikur nuk ka ndodhur asgjë”, tha Tahiri në një konferencë për media.

“Duke qenë bartës të pushtetit në funksionet më të larta shtetërore, ata duhet të na tregojnë se kush i mori dhe zhduki mostrat e Astrit Deharit dhe a dihet se kush i ktheu?. Ku ishin këto mostra dhe për çfarë qëllimi u vodhën nga IML-ja. Zhdukja e këtyre mostrave për një vit e gjysmë a ishte një alibi e pushtetit për ta penguar hetimin penal dhe zbardhjen e vdekjes tragjike të Astrit Deharit?”, ka pyetur ai.

Deputeti i PDK-së ka kërkuar nga Prokuroria që të marrë hapa të menjëhershëm për të vënë para drejtësisë përgjegjësit, derisa ka shtuar se në dhjetor të vitit 2022, u publikua lajmi për zhdukjen e mostrave të Astrit Deharit dhe askush nuk dha përgjegjësi politike që në zyrat shtetërore u zhduken mostrat e këtij rasti.

“Megjithatë, përmasat e tragjedisë u zgjeruan e u thelluan, e pyetjet që mbetën pa përgjigje u shtuan kur, nga njëra anë, po në mars të vitit 2023 u gjetën një pjesë e mostrave të Astrit Deharit, pra u gjetën mostrat e lukthit dhe të urinës, por mungonin epruvetat e mostrave të gjakut. Ndërkohë, në 21 nëntor 2023 kur zyrat e IML-së i kaploi zjarri i dytë, 4 muaj më pas u gjetën edhe mostrat e gjakut”, shtoi.

Ndryshe, më 29 mars, Albanian Post pati raportuar se pas pothuajse një viti e gjysmë mostrat e ish aktivistit të Lëvizjes Vetëvendosje, Astrit Dehari, janë gjetur dhe janë kompletuar.

Lajmi ishte bërë i ditur për AP nga burime brenda IML-së, të cilët kanë thënë se janë gjetur “nga Komisioni i Inventarizimit”.

“Kush i mori dhe kush i ktheu ose s’i ka marrë askush ne nuk e dimë akoma. Ka mundësi edhe që janë gjetur më herët, por janë zyrtarizuar tani”.

Albanian Post ka dërguar pyetje edhe tek Ministria e Drejtësisë lidhur me informacionet që kanë për këtë rast dhe kohës se kur janë kthyer mostrat, por që akoma s’ka pranuar përgjigje.

Dehari ishte anëtar i Lëvizjes Vetëvendosje, i arrestuar bashkë me disa pjesëtarë të tjerë të kësaj lëvizje, nën akuzat se kanë sulmuar Kuvendin e Kosovës.

Ai vdiq në burg. Zyrtarisht u konstatua se ka bërë vetëvrasje, por Vetëvendosje ishte e bindur se dikush e ka vrarë atë.

Nga atëherë, provat janë dërguar edhe në institute jashtë vendit, por nuk është arritur të konstatohet se ka pasur persona të tjerë të përfshirë në vdekjen e Deharit.

Familja e tij, qysh nga vdekja, po vazhdojnë betejën për zbardhjen e rastit. Ata, njëjtë si Vetëvendosje, janë të bindur se dikush ua vrau djalin.

Shtetit i zhduken mostrat e Astrit Deharit nga laboratori, “mungojnë 12 epruveta me gjak”

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.