Lajme

PDK dhe AKR me koalicion në Mitrovicë


Kandidati i PDK-së për kryetar të Mitrovicës, Bedri Hamza, së bashku me kryetarin e AKR-së së Mitrovicës, Gjergj Beka.

Në përkrahje të Bedri Hamzës, kandidatit të PDK-së për kryetar të Mitrovicës, tani është edhe Aleanca Kosovare e Re (AKR).

Kandidati i PDK-së për kryetar të Mitrovicës, Bedri Hamza, së bashku me kryetarin e AKR-së së Mitrovicës, Gjergj Beka, të shtunën kanë zyrtarizuar marrëveshjen e tyre të koalicionit parazgjedhor.

Bedri Hamza, i cili është kandidat i PDK-së për kryetar të Mitrovicës, ka thënë se ata po i bashkon Mitrovica dhe vullneti i përbashkët për të punuar për të mirën e qytetarëve të Mitrovicës.

“Na ka bashkuar Mitrovica dhe qytetarët tanë kudo që ata jetojnë. Na kanë bashkuar hallet e problemet e tyre dhe vullneti ynë i përbashkët që ta japim maksimumin tonë për t’ua lehtësuar jetesën, përmirësuar mirëqenien dhe për t’iu shërbyer sa më mirë atyre”, ka shkruar Hamza në Facebook.

Ai u shpreh se ky koalicion parazgjedhur po bëhet për të sjell ndryshimin në qytetin e Mitrovicës.

“Mitrovica ka nevojë për ndryshim dhe ne po bashkohemi që të gjithë qytetarëve, përtej interesave politike, t’ua garantojmë ndryshimet e nevojshme për të mirën e përgjithshme të Mitrovicës. I falënderoj strukturat drejtuese të AKR-së në Mitrovicë për besimin e tyre dhe mbështetjen që po më japin në këtë garë për kryetar të Mitrovicës”, ka thënë Hamza.

Në këtë marrëveshje parazgjedhore, AKR-ja zotohet të mbështesë kandidatin e PDK-së, Bedri Hamzën, për kryetar të Mitrovicës.

PDK-ja dhe AKR-ja, sipas kësaj marrëveshjeje, në rast se fitojnë zgjedhjet lokale në Mitrovicë do të bashkëqeverisin për një mandat katërvjeçar.

Aleanca Kosova e Re, ka bërë koalicion edhe me Lidhjen Demokratike të Kosovës në qytetin e Vushtrrisë dhe me Lëvizjen Vetëvendosje në Kamenicë.

Ndryshe zgjedhjet lokale në Kosovë pritet të mbahen më 17 tetor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore