PD për vdekjen e Lear Kurtit: Fajin e ka Policia

Partia Demokratike ka reaguar pas një raporti të publikuar nga Avokati i Popullit, ku specifikohet se 32-vjeçari Lear Kurti, i cili më 19 tetor ndërroi jetë pas shoqërimit në komisariatin numër 3 të Policisë së kryeqytetit, mund të ishte parandaluar.

Në një deklaratë për shtyp të mbajtur nga zëdhënësja për shtyp e demokratëve, Floriana Garo, forca e djathtë politike mban një qëndrim drastik ndaj forcave blu dhe Ministrisë së Brendshme, duke i akuzuar në mënyrë të drejtpërdrejtë për vdekjen e të riut.

“Së pari, vdekja e Leart Kurtit lidhet direkt me veprimet e Policisë ndaj tij dhe së dyti, Ardi Veliu fshehu, falsifikoi dhe manipuloi rrethanat e vdekjes së te riut”, përkufizohet në deklaratën e Garos.

Raporti i Avokatit të Popullit e bën të qartë këtë gjë, siç pretendon Garo, duke përmbledhur se shoqërimi i të riut ka qenë në kundërshtim me dispozitat ligjore.

Sipas raportit nga Avokati i Popullit, punonjësit e policisë kanë qenë të paqartë dhe nuk kanë marrë masa kur ky person është ndjerë keq.

“Duke mbajtur në konsideratë natyrën e çështjes, në raste të tilla shërbimet e policisë, mund ta parandalonin këtë ngjarje, në kushtet e veprimeve apo mosveprimeve që përfaqësuesit e rendit publik kishin si detyrim të kryenin”, shkruhet aty.

Konkretisht Avokati i është referuar ligjit nr. 108/2014 për Policinë e Shtetit, neni 122 pika 1 dhe 2, ku përcaktohet se: masat mbrojtëse merren ndaj personit të sëmurë mendor, në gjendje të dehur, nën efektet e lëndëve narkotike ose ndaj personit me sëmundje ngjitëse të rënda.

Në bazë të këtyre detajeve, për PD-në, akuzat për vdekjen e të riut shkojnë vetëm për nga institucionet shtetërore, siç përmbyll Garo.

Vdekja e Lear Kurtit mund të ishte parandaluar, thotë Avokati i Popullit

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.