Pavard i nervozuar me Nagelsmann – lëshon stërvitjen para kohe, gati të përfitojë Chelsea

Mbrojtësi i Bayern Munich-ut, Benjamin Pavard, pritet që në këtë janar të largohet nga skuadra bavareze.

Sipas asaj që raportojnë mediat në Gjermani, PAvard lëshoi sot (e hëne, 31 tetor) stërvitjen me skuadrën bavareze, pasi thuhet që të ketë pasur një zënkë me trajnerin e tij, Julian Nagelsmann.

Pavard ishte i pari që u largua nga Allianz Arena pasi Bayern mposhti Mainzin 6-2, pavarësisht se hyri si zëvendësues në pjesën e dytë për kampionët e Bundesligës fundjavën e kaluar.

Sipas “Daily Star”, 26-vjeçari, i cili është i lidhur fort me një kalim te Chelsea verën e kaluar, duket se lëvizja drejt klubit londinez do të ndodhë gjatë afatit kalimtar dimëror.

Nagelsmann e ka zbritur Pavard në stol në tre nga pesë ndeshjet e fundit të tyre, duke e mërzitur shumë mbrojtësin francez.

Pavard ka qenë zgjedhja e parë e mbrojtësit të djathtë të Bayern-it që kur u bashkua nga Stuttgart-i për 31.5 milionë funte në vitin 2019, por gjithçka duket se po ndryshon pasi Noussair Mazraoui tani është zgjedhja e preferuar e trajnerit gjerman.

Pra, Chelsea tani mund ta shfrytëzojë më së miri situatën mes Pavard-it dhe klubit dhe të përfitojë për një transferim të tij në janar, qoftë si huazim, apo edhe blerje me ndonjë çmim më të ulët.

Pavard ishte i hapur ndaj idesë për t’u bashkuar me gjigantët e Premier League në afatin kalimtar të verës, por klubet nuk arritën marrëveshje.

Kontrata mes mbrojtësit francez dhe klubit skadon në verën e vitit 2024 dhe aktualisht nuk ka bisedime për ta vazhduar atë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.