Pas homazheve te ish-presidentit Rugova, Abdixhiku kërkon të ruhet partneriteti me ShBA-në

Ashtu si çdo vit, paria e Lidhjes Demokratike të Kosovës, ndër të parat gjëra që bën më 26 janar është vizita pran varrit të Presidentit të parë të Republikës së Kosovës, Ibrahim Rugova.

Kryetari i LDK-së, Lumir Abdixhiku me bashkëpunëtorë, kanë bërë homazhe pranë varrit të tij.

Nga aty, Abdixhiku ka thënë se ka thënë se Rugova jo vetëm që punoi për shtetin e Kosovës, por jetoi me këtë ide. Tha se ish-presidenti mbetët një patriot i papërsëritshëm, teksa tha se obligim i tyre mbetët partneriteti me ShBA-në, BE-në e NATO-n.

“Sot bashkë me anëtarë të LDK-së me struktura të LDK-së kemi ardhur të bëjmë nderime për atin themeltar të Kosovës për presidentin historik të Kosovës. Rugova mbetet një patriot i papërsëritshëm që dha vizionin e së ardhmes së Kosovës, këtë vizion e kemi obligim ta vazhdojmë në partneritet me ShBA në anëtarësim në BE dhe NATO”, u shpreh Abdixhiku.

Abdixhiku shtoi se Rugova ishte një njeri që ka prirë një popull të tërë nga dita e parë e aktivizimit të tij politik deri më 2006 kur kjo lidhje u shpërfaq me një masë të jashtëzakonshme të njerëzve që i dhanë lamtumirën e fundit.

“Me anëtarë të kryesisë së LDK-së, kemi ardhur për të bërë nderime dhe kujtime për liderin e LDK-së, për atin themeltar të shtetit të Kosovës, për presidentin historik Dr.Ibrahim Rugova. Një njeri që ka shënuar një epokë të tërë, që ka prirë një popull të tërë nga dita e parë e aktivzimit të tij politik deri më 21 janar të vitit 2006 kur kjo lidhje u shpërfaq me një masë të jashtëzakonshme të njerëzve që i dhanë lamtumirën e fundit në shesh dhe në Kuvend në një ditë të ftohtë”.

Pas homazheve tek varri, kryetari i LDK-së, Lumir Abdixhiku me bashkëpunëtorë ka shkuar edhe tek familja e presidentit Ibrahim Rugova, në 16 vjetorin e vdekjes së tij.

Abdixhiku ndër të tjera tha se Rugova mbetet vula identitare e lirisë dhe Pavarësisë së Kosovës.

“Vepra e paarritshme e Presidentit Rugova mbetet vula identitare e lirisë dhe pavarësisë së Kosovës. Ai u rreshtua drejt vlerave perëndimore në momentet më të vështira, ndërtoj kohezion brenda e aleanca të pathyeshme jashtë; udhëhoqi nëpër kohë të paqarta, dhe tregoi me bindje rrugën përpara”.

“Trashëgimia e tij politike e atdhetare është orientim dhe projeksion i ndërtimit të një shoqërie ku kultivohen të drejtat fundamentale për një shoqëri moderne. Kjo trashëgimi e tij, vazhdon të jetë udhërrëfyese edhe për gjeneratën e sotme e të ardhme. Kosova, shtet i pavarur e sovran, e anëtarësuar në NATO dhe në BE, e me miqësi të përhershme me SHBA-të, është udhërrëfim për ne”.

“Ibrahim Rugova, Ati themeltar i shtetit të Kosovës, është figura më e madhe politike e historisë së Kosovës. Identifikimi me të, prandaj, paraqet vlerë; e këtë vlerë ne do ta mbrojmë dhe kultivojmë me përkushtim, me dije dhe me admirimin më të madh”, ka thënë Abdixhiku.

Osmani e Kurti pranë varrit të ish-presidentit Rugova: Ai bashkoi shqiptarët kundër okupatorit serb

Në 16-vjetorin e vdekjes së ish-presidentit Ibrahim Rugova, presidentja Vjosa Osmani dhe kryeministri Albin Kurti, kanë bërë homazhe pranë varrit të ish-presidentit.

Presidentja e vendit, tha se tha se veprimtaria e Rugovës ka qenë e vështirë, kur Kosova ishte nën okupim.

E para e vendit tha se Rugova është arkitekti dhe ideatori i pavarësisë që sot e gëzojmë.

Osmani tha se kujtimi për të do të jetojë në mendjet dhe zemrat e qytetarëve të Kosovës përjetësisht.

“Sot është 16 vjetori i shkuarjesh në amshim të arkitektit dhe ideatorit të pavarësisë së Kosovës, i cili bëri shumëçka për shtetin tonë saqë është shndërruar në fytyrën e këtij shteti. Ai veproi dhe punoi në një kohë shumë të vështirë për popullin e Kosovë, por në të njëjtën kohë arriti të bëjë bashkë popullin e Kosovës. Ne sot e gëzojmë shtetin tonë por edhe miqësitë që me shumë mund e përkushtim i ndërtoi presidenti Rugova”, tha presidentja Osmani.

E shefi i Qeverisë, Albin Kurti, ka thënë se ish-presidenti Rugova ishte intelektual i angazhuar, njeri paqësor dhe i qetë, racional e humanist që dha kontribut tejet të çmuar në bashkimin e shqiptarëve kundër okupatorit serb dhe ndërkombëtarizimin e çështjes së Kosovës.

“Presidenti Rugova është presidenti i parë i Kosovës, i zgjedhur me votë popullore dhe presidenti i parë i Kosovës së çliruar. Doktor Rugova edhe para se të ishte president, ishte intelektual i angazhuar, njeri paqësor dhe i qetë, racional e humanist. Ai dha kontribut tejet të çmuar në bashkimin e shqiptarëve kundër okupatorit serb dhe ndërkombëtarizimin e çështjes së Kosovës. Bashkë me presidenten sot në nderim të Rugovës te varri i tij vendosëm një kurorë me lule të freskëta”, u shpreh Kurti.

Ministri i Pylltarisë dhe Bujqësisë dhe Zhvillimit Rural, Faton Peci, në cilësinë e përfaqësuesit të “Listës Guxo”, ka bërë homazhe pranë varrit të ish-presidentit Rugova, në përvjetorin e 16 të vdekjes së tij.

Peci ishte i shoqëruar nga deputeti Haxhi Avdyli dhe bashkëpunëtorë tjerë.

Para mediave, ministri Peci tha se kontributi që presidenti Rugova ka dhënë në momentet vendimtare, e bëjnë presidentin Rugova jo vetëm arkitekt të pavarësisë së Kosovës po njërin ndër figurat më të mëdha më të rëndësishme historisë së kombit shqiptar.

“Guximi i presidentit Rugova që në vitin 1989 të jetë në ballë në Lëvizjen gjithë popullore për lirinë dhe pavarësinë e Kosovës. Vizioni i qartë, orientimi i tij pa ekuivokë me qasje pro perëndimore dhe synimet që Kosova të jetë shtet i pavarur dhe sovran miqësi të përhershme me SHBA-në”.

“Kontributi i tij në pluralizmin politik dhe eliminimin e ndikimin të bllokut sovjetik të shekullit të kaluar qasja dhe kontributi i tij në krijimin e aleancave me shtetet vendimmarrëse në radhë të parë me SHBA dhe me vendet e BE-së. Kontributi që presidenti Rugova ka dhënë në momentet vendimtare me krijimin e unitetit mbar shqiptarë e bëjnë presidentin Ibrahim Rugova jo vetëm arkitekt të pavarësisë së Kosovës po njërin ndër figurat më të mëdha më të rëndësishme historisë së kombit shqiptar”, u shpreh ai.

Sot janë bërë 16 vjet nga vdekja e presidentit historik të Kosovës, Ibrahim Rugova.

Ai vdiq më 21 janar të vitit 2006, u varros me nderime të larta shtetërore dhe ushtarake.

Funerali i Rugovës ishte njëri nga më të mëdhenjtë në historinë shqiptare. Rugova u varros 5 ditë pas vdekjes, më 26 janar.

Rugova ishte Presidenti i parë i Republikës së Kosovës, duke shërbyer në vitet 1992–2000 dhe përsëri në vitet 2002–2006. Ishte intelektual, akademik dhe kritik letrar i njohur shqiptar. U njoh si lider i lëvizjes më të madhe paqësore në Evropë, i lëvizjes së gjerë për emancipim, çlirim kombëtar e pavarësi të Kosovës.

Dr. Ibrahim Rugova u lind më 2 dhjetor 1944 në Cerrcë të Istogut. Më 10 janar 1945 komunistët jugosllavë ia pushkatuan të atin, Ukën dhe gjyshin Rrustë Rugovën, që kishte qenë luftëtar i njohur kundër çetave çetnike që po depërtonin në Kosovë gjatë Luftës së Dytë Botërore.

Në vitet 1976-1977, ai studioi nën mbikëqyrjen e Roland Barthes në Paris, ku zhvilloi interesat e tij shkencorë në letërsi me një fokus në teorinë letrare

Ai themeloi LDK-në në vitin 1989 si një lëvizje e gjerë e cila udhëhoqi institucionet “paralele” të Kosovës në vitet 1990, pasi lideri serb Sllobodan Millosheviç kishte shfuqizuar statusin autonom të Kosovës.

Pasi Beogradi vendosi sundimin e drejtpërdrejtë, Rugova u zgjodh jo zyrtarisht si president i Kosovës për dy mandate.

Kur NATO-ja nisi sulmet ajrore në një përpjekje për ta detyruar Millosheviçin të tërhiqte forcat policore, ushtarake dhe paraushtarake serbe nga Kosova në mars 1999, policia hyri në shtëpinë e Rugovës në Prishtinë dhe e vendosi atë dhe familjen e tij në arrest shtëpie.

Pas më shumë se një muaj, Rugova dhe familja e tij u lejuan të largoheshin për në Itali. Ai u kthye në shtëpi në Kosovë pas përfundimit të luftës, në korrik 1999.

Ai u zgjodh zyrtarisht president nga parlamenti në vitin 2002 dhe u rizgjodh në vitin 2005.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.