Parlamenti i Armenisë ka votuar për t’iu bashkuar Gjykatës Penale Ndërkombëtare (ICC), duke e detyruar ish-republikën sovjetike të arrestojë presidentin e Rusisë, Vladimir Putin, nëse ai do të vizitonte vendin.
Vendimi i së martës do të tensionojë më tej marrëdhëniet me Moskën, aleatin tradicional të Armenisë. Marrëdhëniet tashmë janë dëmtuar rëndë për shkak të pushtimit të Ukrainës nga Kremlini dhe rimarrjes së Nagorno-Karabakut nga Azerbajxhani.
Kremlini paralajmëroi Armeninë javën e kaluar se vendimi i saj për t’iu bashkuar ICC-së, e cila ka lëshuar një urdhër arresti për Putinin për mbikëqyrjen e rrëmbimit të fëmijëve ukrainas, ishte “jashtëzakonisht armiqësor”.
Kryeministri i Armenisë, Nikol Pashinyan, është përpjekur të sigurojë Rusinë se vendi i tij po trajton vetëm ato që thotë se janë krime lufte të kryera nga Azerbajxhani në konfliktin afatgjatë me fqinjin e tij dhe nuk po synon Moskën.
Zëdhënësi i Kremlinit, Dmitry Peskov, të martën e përshkroi vendimin armen për t’iu bashkuar ICC-së si “të papërshtatshëm nga pikëpamja e marrëdhënieve tona dypalëshe”.
Moska “absolutisht nuk pajtohet me fjalët e Pashinyan se Armenia ka vendosur të aderojë në statutin e Romës, i cili themeloi ICC, sepse mjetet e Organizatës së Traktatit të Sigurisë Kolektive (CSTO) të udhëhequr nga Rusia dhe partneriteti armeno-rus nuk ishin të mjaftueshme për të siguruar sigurinë e vendit”, tha ai.
“Pala armene nuk ka mekanizma më të mirë se ata, dhe ne jemi të sigurt për këtë”, tha ai.
Pashinyan, në një fjalim fundjavën e kaluar për të shënuar ditën e pavarësisë së Armenisë, tha se “sistemet e sigurisë dhe aleatët në të cilët jemi mbështetur për shumë vite” ishin “të paefektshme” dhe se “instrumentet e partneritetit strategjik armeno-rus” nuk ishin ” mjaftueshëm për të garantuar sigurinë e jashtme të Armenisë”.
Peskov nuk konfirmoi nëse Putin do të shmangte udhëtimin në Armeni si rezultat i vendimit të parlamentit, por tregoi se mund të jetë kështu: “Sigurisht, ne nuk do të donim që presidenti të abstenonte nga vizitat në Armeni për ndonjë arsye. ”
Rusia, me një bazë ushtarake në Armeni, ka qenë prej kohësh garantuesi i saj i sigurisë, duke përfshirë menaxhimin e tensioneve mbi Nagorno-Karabakh, por ndërsa Azerbajxhani nisi ofensivën e tij në rajonin e shkëputur malor, Moska e bëri të qartë se trupat e saj nuk kishin ndërmend të ndërhynin.
Ndërsa trupat e Azerbajxhanit rrethuan Nagrono-Karabkah, Pashinyan, kritikoi Moskën dhe vuri në dyshim efektivitetin e 2 mijë trupave ruse të dislokuara që nga viti 2020 për të ruajtur paqen në rajon.
Richard Giragosian, kreu i Qendrës së Studimeve Rajonale në kryeqytetin e Armenisë, Jerevan, tha se vendimi i vendit për të ratifikuar traktatin themelues të ICC-së ishte shenja e fundit që Pashinyan po përpiqej të reduktonte ndikimin e Moskës.
Muajin e kaluar, Jerevani priti trupat amerikane për një stërvitje të paprecedentë të përbashkët ushtarake. Ajo ka dërguar gjithashtu ndihma humanitare në Ukrainë, të dorëzuar personalisht nga gruaja e Pashinyan, Anna Hakobyan.
Ministrja e Jashtme e Francës, Catherine Colonna, fluturoi për në Armeni të martën për të vlerësuar nevojat urgjente të vendit pasi u përball me një fluks refugjatësh nga Nagorno-Karabakh dhe rrezikun e operacioneve ushtarake të Azerbajxhanit në territorin e tij, thanë diplomatët.
Paaftësia e Putinit për të udhëtuar në Armeni, një vend që ai e vizitoi për herë të fundit në vitin 2022, është një simbol i shndritshëm i ndikimit të tij në rënie në Kaukazin e Jugut.
Udhëheqësi rus anashkaloi samitin e Brics në Afrikën e Jugut në gusht mes spekulimeve se ai mund të arrestohej sipas urdhër-arrestit të ICC.
Ndërkohë, Azerbajxhani vazhdon të arrestojë dhe akuzojë udhëheqjen etnike armene të Nagorno-Karabakut pas pushtimit të rajonit.
Të martën, Baku njoftoi se kishte arrestuar dy ish-krerë të rajonit separatist si dhe ish-kryetarin e parlamentit. Media shtetërore e Azerbajxhanit tha se të tre burrat ishin transferuar në Baku.
Një ditë më parë, prokurori i përgjithshëm i Azerbajxhanit, Kamran Aliyev, njoftoi se vendi kishte hapur çështje penale kundër 300 zyrtarëve separatistë.
Javën e kaluar, policia kufitare e Azerbajxhanit arrestoi Ruben Vardanyan, një bankier dhe filantrop i shquar miliarder, i cili për një kohë të shkurtër kishte një detyrë të lartë politike në Nagorno-Karabah.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Protestat në kampusin amerikan: Grupet rivale të protestës në Gaza përleshen në UCLA
-
Diplomatët shpresojnë për një marrëveshje ndërsa Izraeli zbut qëndrimin
-
Anketa e IRI për Kosovën: SHBA-të aleati më i rëndësishëm, Serbia kërcënimi më i rrezikshëm
-
Liria e medias “rrezikshëm afër pikës së thyerjes” në disa vende të BE-së
Lajmet kryesore
-
BE duhet të zgjerohet ose të përballet me ‘Perden e re të Hekurt’, paralajmëron Michel
-
Forcimi i gjyqësorit është investimi më i mirë për të ardhmen e Shqipërisë, thotë Gonzato
-
Liria e medias “rrezikshëm afër pikës së thyerjes” në disa vende të BE-së
-
Osmani kërkon mbështetjen e Zvicrës për anëtarësimin e Kosovës në KiE