Fundjavën që lamë pas, disa nga futbollistët e Kosovës patën paraqitje shumë të mira me klubet e tyre evropiane.

Pa dyshim që më i miri nga Dardanët ishte Astrit Selmani, i cili realizoi plot katër gola në fitoren e ekipit të tij, Hammarby me rezultat 5:3 ndaj Kalmar, në ndeshjen e xhiros së fundit të Superligës së Suedisë.

Kosovari ishte i pandalshëm në këtë takim, ku në pjesën e parë arriti që të realizoi plot tre gola, që njëkohësisht ishte edhe “hat-trick” i parë në karrierën e tij.

Më pas Astriti shënoi edhe një gol vetëm pesë minuta pasi filloi pjesa e dytë, i cili ishte goli i nëntë i këtij sezoni për të, që përveç tyre ka dhuruar edhe gjashtë asistime në ligën suedeze, e cila tashmë ka përfunduar.

Gol prej Dardanëve shënoi edhe një tjetër futbollist. Bëhet fjalë për mbrojtësin Mirlind Kryeziu, i cili gjeti rrugën e rrjetës në fitoren e ekipit të tij, Zurich, me shifrat 4:0 ndaj Luzern-it.

Në këtë ndeshje, për 90 minuta luajti edhe bashkëlojtari i tij, Fidan Aliti, të cilët po kalojnë momente shumë të mira në Superligën e Zvicrës, që aktualisht i prijnë tabelës me 34 pikë.

Ndërkohë, paraqitje të mirë si gjithmonë, pati edhe kapiteni i Kosovës, Amir Rrahmani, i cili luajti 90 minuta me skuadrën e tij, Napolin.

Napoli e humbi këtë takim me shifrat 2:3, mirëpo paraqitja e Rrahmanit ishte mjaft e mirë.

Kurse në Serie A italiane, Vedat Muriqi arriti fitore me Lazio-n në udhëtim te Sampdoria, ku sulmuesi kosovar luajti tërë pjesën e dytë, por nuk arriti të shënojë gol.

90 minuta ishte në fushë edhe gardiani verdhekaltër, Arijanet Muriq, ekipi i të cilit pësoi humbje me rezultat 2:0 nga liderët e Trabzonspor, në ndeshjen e zhvilluar në kuadër të Superligës së Turqisë.

Paraqitje tejet pozitive pati Florent Hadërgjonaj, ekipi i të cilit, Kasimpasa barazoi me rezultat 1:1 përballë skuadrës së Besiktas-it.

Edon Zhegrova luajti për 80 minuta me Basel-in këtë javë, por nuk ia doli ta ndihmojë ekipin e tij, pasi që humbën me shifrat 0:1 ndaj Lousanne-s.

I pafat ishte Valon Berisha, i cili brenda 35 minutave mori dy kartonë të verdhë, për t’u përjashtuar nga loja në ndeshjen që ekipi i tij, Reims e humbi me rezultat 1:2 ndaj Angers.

Betim Fazliji luajti për 90 minuta, por klubi i tij, St. Gallen, humbi me rezultat 0:4 në shtëpi ndaj Grasshoppers.

Ndërsa, Milot Rashica, Elbasan Rashani e Lirim Kastrati nuk mundën të paraqiten me ekipet e tyre, pasi që ishin të lënduar.

Klopp paralajmëron formacion të dytë ndaj Milan-it

Paraqitja e Dardanëve në fundjavë

albanianpost

Fabian Ruiz, emri kryesor në agjendën e Liverpool-it