Paralajmërimet e Vuçiç-it, Kurti: Në koordinim me Rusinë po përgatit kërcënime dhe ultimatume ndaj Kosovës

Kryeministri i Kosovës, Albin Kurti, ka thënë se Presidenti i Serbisë, Aleksandër Vuçiç, në koordinim me Rusinë po përgatit kërcënime dhe ultimatume të reja ndaj Kosovës, por ka theksuar se këto kërcënime shtetin që ai e udhëheqë nuk e trembin.

Këto komente, Kurti i ka bërë përmes një postimi në Facebook, pas paralajmërimeve që bën disa media të afërta me pushtetin në Serbi se të premten Vuçiç mund të shpallë Kosovën “territor të okupuar”.

“25 vjet pas gjenocidit në Kosovë, me 186 masakra, rreth 500 varreza masive në Kosovë, 5 varreza masive në Serbi, ku mbetën të vrarë mbi 13 mijë njerëz (1392 fëmijë; 1739 gra; 1882 të moshuar), rreth 20 mijë gra e vajza të dhunuara dhe keqtrajtuara, dhjetëra mijëra qytetarë të persekutuar, mbi 860 mijë të dëbuar nga Kosova dhe qindra mijëra të tjerë që nga malet shihnin qysh po ju plaçkiten e digjen shtëpitë (gjithsej 119,855 sosh)…”.

“…dhe ende 1595 persona të zhdukur me dhunë, qindra familje që jetojnë me ankth e dhembje, ndërsa i mbanë të fshehura informacionet për vendndodhjen e të paktën 11 varrezave masive brenda territorit të saj, Serbia e drejtuar nga ministri i Millosheviç-it, në bashkëpunim me Rusinë, po përgatitin kërcënime dhe ultimatume të reja në drejtim të Kosovës”, shkroi Kurti.

Serbia, shtoi Kurti, flenë mbi varreza masive nga gjenocidi i kryer në Kosovë, derisa përmendi disa nga krimet makabre të kryera nga regjimi serb.

“950 civilë të paarmatosur u masakruan, ua rrëmbyen kufomat dhe i futën në varreza masive në Serbi, përfshirë këtu kamionë frigoriferë që dolën nga fundi i liqeneve atje. Dëshmitë e gjenocidit janë të freskëta gjithandej në Kosovë e Serbi, por kjo nuk po e pengon Presidentin e Serbisë për të kërcënuar sërish”, shtoi.

Kryeministri potencoi se në vend që Serbia të pendohet për krimet, të kërkojë falje për to dhe të mos i mohojë ato, t’i hapë arkivat e luftës dhe ushtrisë jugosllave, sidomos të brigadës së motorizuar 37, të paguajë dëmshpërblimet; të bashkëpunojë për të vendosur drejtësi për viktimat e gjenocidit; të angazhohet për pajtim e paqe duke reflektuar mbi përgjegjësinë që ka, ka zgjedhur të kundërtën.

“Duke përsëritur kërcënimet dhe ultimatumet, ndaj Kosovës dhe qytetarëve të saj, në bashkëpunim dhe koordinim të afërt me Rusinë. Krimet makabre që Serbia para 25 vjetëve i kreu në Kosovë, sot po përsëriten nga Rusia në Ukrainë dhe po synohen që të kthehen prapë në rajonin e Ballkanit”.

Kurti konsideron se qasja e pushtetit në Serbi ndaj Kosovës është tejet dëshpëruese.

“Fillimisht u normalizua pandëshkueshmëria dhe fushatat propaganduese. E tash po synohen të normalizohen sulmet paramilitare dhe terroriste (Banjska, 24 shtator 2023), kërcënimet dhe ultimatumet, të cilat arsyetohen me lajme të rrejshme dhe fushata dezinformuese, para syve të botës demokratike”, pohoi.

Por, Kurti potencoi se sot, Kosova është më e fortë se kurrë më parë dhe se nuk trembet nga kërcënimet.

“Ne mbrojmë të gjithë qytetarët tanë dhe liritë e të drejtat e tyre, integritetin territorial dhe sovranitetin shtetëror të vendit tonë, progresin demokratik e socio-ekonomik të popullit dhe institucioneve tona”.

Mirëpo, sipas Kurtit, kjo që po ndodhë aktualisht, tregon se sa larg është Serbia nga vlerat demokratike dhe njerëzore dhe sa e mishëruar mbetet me gjenocidin e kryer në vitet e ‘90-ta.

Ndryshe, të premten, Presidenti i Serbisë, Aleksandër Vuçiç, nga ora 18:00, do të mbajë një konferencë për media ku do t’i drejtohet popullit serb për të kumtuar “masat serioze” që i ka paralajmëruar disa ditë më parë.

Ndërsa, disa media të afërta me regjimin e Vuçiç-it kanë shkruar se njëri nga opsionet në tavolinë është edhe shpallja e Kosovës “territor i okupuar”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.