Drejtori i Përgjithshëm i Agjencisë së Inteligjencës së Kosovës (AKI), Petrit Ajeti, do të ftohet javën e ardhshme në Komisionin për Siguri për raportim për shkak të deklaratave të krerëve të shtetit që Kosova s’është në një situatë stabile të sigurisë.

Lajmin e ka bërë të ditur kryetarja e komisionit parlamentar për siguri, Ganimete Musliu.

“Njëri nga vendimet që mori sot Komisioni është që të mërkurën të ftohet drejtori i përgjithshëm i AKI-së dhe të njoftoj për gjendjen e sigurisë. Kjo për shkak se kemi dëgjuar deklarata të shumta të krerëve të shtetit për ndjeshmërinë e sigurisë në vend dhe rreziqet e mundshme”, ka thënë Musliu para gazetarëve.

Ajo ka sqaruar se gjatë mbledhjes kanë trajtuar raportin një vjeçar të AKI-së, ku ka raportuar kryeinspektori Kujtim Shala.

“Evidentuam shumë çështje të brendshme të AKI-së, për të cilat u dakorduam se në ditët në vazhdim t’i trajtojmë në mënyrë të detajuar. Në raportet të cilat prezantohen zakonisht kemi të bëjmë me shifra teknike dhe jo shpesh herë i shohim këto detaje, por si komision e kemi të drejtën të kemi qasje në dokumente dhe të shohim të gjitha veprimet që janë marrë nga inspektorati”.

Të gjithë krerët e shtetit së fundmi kanë paralajmëruar për një situatë jo të mrië të sigurisë në Kosovë.

Së fundmi ishte kryeministri i Kosovës, Albin Kurti, i cili gjatë një interviste për prestigjiozen amerikane, CNN, ka potencuar se “Serbia është shumë agresivë ndaj Kosovës”.

“Fillimisht duke mos e njohur si shtet të pavarur, krahas kësaj është e angazhuar në luftë hibride dhe bën stërvitje ushtarake në kufi”, i tha ai gazetares britaniko-iraniane, Christiane Amanpour.

Duke nënvizuar faktin se Serbia ka 48 baza operative përgjatë kufirit me Kosovën, Kurti potencoi se Beogradi është “në pritje të një dritareje të re të mundësive”.

Ndërsa, ministri i Mbrojtjes së Kosovës, Ejup Maqedonci, në një intervistë për Albanian Post ka deklaruar se Forca e Sigurisë së Kosovës në vazhdimësi përgatitet dhe trajnohen në rast të ndonjë sulmi nga jashtë, eventualisht nga grupe që financohen nga Serbia.

Edhe ministrja e Punëve të Jashtme, Donika Gërvalla, më 8 korrik ka deklaruar se do të shpërthejë një luftë e gjithanshme në rajon.