Një nga krijueset e vaksinës Oxford-AstraZeneca ka paralajmëruar se pandemitë e ardhshme mund të jenë më vdekjeprurëse nga sa është COVID-i i sotëm.
Ajo, profesoresha Sarah Gilbert, ka ravijëzuar se nevojiten më shumë fonde për gatishmërinë ndaj pandemisë çka do të shërbejë për të parandaluar humbjen e përparimeve të derimëtanishme.
Nga ana tjetër, ka vënë në dukje se vaksinat priten të jenë më pak efektive ndaj variantin të ri të virusit, Omicron.
Për këtë arsye, tregon agjencia e lajmeve “BBC”, njerëzit duhet të jenë më të kujdesshëm derisa të mësohet më shumë rreth tij.
“Kjo nuk do të jetë hera e fundit që një virus kërcënon jetën dhe jetesën tonë. E vërteta është se të radhës mund të jenë edhe më keq. Mund të jenë më ngjitës, më vdekjeprurës, ose të dyja së bashku”, ka thënë Gilbert.
Ajo ka shtuar se “nuk mund të lejojmë një situatë ku kemi kaluar gjithçka çka kemi kaluar dhe më pas të kuptojmë se humbjet e mëdha ekonomike që kemi pësuar nënkuptojnë se nuk ka ende fonde për gatishmërinë ndaj pandemisë”.
“Përparimet që kemi bërë dhe njohuritë që kemi fituar, nuk duhet të humbasin”, ka theksuar profesoresha.
Për variantin Omicron, ajo ka sqaruar se proteina e tij spike përmban mutacione të njohura për të rritur transmetueshmërinë e virusit.
“Por ka ndryshime shtesë që mund të nënkuptojnë se antitrupat e shkaktuar nga vaksinat, ose nga infektimi me variante të tjera, mund të jenë më pak efektive në parandalimin e infektimit me Omicron”, ka dalluar ajo.
Sipas Gilbert, “derisa të dimë më shumë, duhet të jemi të kujdesshëm dhe të ndërmarrim hapa për të ngadalësuar përhapjen e këtij varianti të ri”.
Gjithashtu ka bërë thirrje që përparimi i shpejtë i parë në dhënien e vaksinave dhe ilaçeve gjatë pandemisë të bëhet normë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
