Osmani takon kryetarin e Rajonit të Kalabrisë: Komuniteti arbëreshë pjesë e rëndësishme e diversitetit etnik të Italisë

Presidentja e Kosovës, Vjosa Osmani, gjatë vizitës së saj tek arbëreshët në Itali, këtë të mërkure është takuar me kryetarin e Rajonit të Kalabrisë, Roberto Occhiuto, me të cilin ka biseduar mbi shtrirjen e mëtejme të bashkëpunimit mes Kosovës dhe Rajonit të Kalabrisë.

Siç njofton zyra e presidentes, Osmani ka theksuar se “lidhjet mes vendit tonë dhe Rajonit të Kalabrisë janë të hershme dhe janë të mbështetura në trashëgiminë historike e kulturore”.

“Komuniteti i arbëreshëve, i cili prej shekujsh jeton në disa rajone të Italisë, përfshirë Kalabrinë, përbën të diversitetit etnik, gjuhësor e kulturor të Italisë dhe pjesë të rëndësishme të saj”, thuhet në njoftimin e presidencës.

Tutje, në njoftim thuhet se e para e vendit ka potencuar se kujdesi ndaj të drejtave të bashkësive etnike kontribuon në mënyrë aktive edhe në zhvillimin ekonomik të Italisë.

“Ajo e falënderoi kryetarin Occhiuto për kujdesin ndaj ruajtjes së identitetit kombëtar të arbëreshëve dhe theksoi se integrimi i plotë dhe kontributi i tyre në jetën socio-ekonomike, u japin marrëdhënieve një dimension tjetër dhe të veçantë”.

Po ashtu, presidentja kosovare i ka shpalosur shembullin e Kosovës për mbrojtjen e pakicave, dhe shtoi se sa më shumë që përkrahet komuniteti arbëresh në ruajtjen e identitetit kulturor e gjuhësor, aq më shumë do të kontribuojë ky komunitet edhe në zhvillimet e raporteve ndërmjet Italisë dhe hapësirave shqiptare.

“Jemi të bindur se mund të ndiqen politika aktive për respektimin e gjuhëve të pakicave, për të mbrojtur dhe përmirësuar gjuhën dhe trashëgimin kulturore të pakicave gjuhësore dhe historike të Kalabrisë, përfshirë bashkësinë arbëreshe. Përmirësimi i mëtejmë i politikave për ruajtjen dhe promovimin e gjuhës e të traditave është e ndërlidhur me politikat e shkollimit në gjuhën e pakicave”, tha Osmani.

Gjithashtu, ajo ka bërë me dije se në Rajonin e Kalabrisë është kultivuar tradicionalisht “një pjesë e rëndësishme e trashëgimisë sonë kulturore, përfshirë atë letrare, që gjendet në dokumente e revista shumë të rëndësishme për popullin shqiptar, të cilat duhen ruajtur dhe digjitalizuar, në mënyrë që të shpërndahen më lehtë tek të rinjtë dhe brezat e ardhshëm”.

Presidentja dhe kryetari Occhiuto kanë diskutuar edhe për mundësitë e zgjerimit të bashkëpunimit ekonomik mes Kosovës dhe Italisë, përfshirë rajonin e Kalabrisë. Presidentja i ftoi ndërmarrjet, bizneset dhe investitorët italianë që të investojnë në sektorët strategjikë të ekonomisë së vendit.

“Ne duhet t’i afrojmë edhe më tej operatorët tanë ekonomikë e turistikë, në mënyrë që të krijohen itinerare të përbashkëta turistike nga Kalabria për në Kosovë dhe anasjelltas. Hapja e linjave të drejtpërdrejta të fluturimit mes aeroporteve tona e ndihmon turizmin e ndërsjellë dhe thellimit të lidhjeve me Kalabrinë dhe qytetarët e rajonit”, tha ajo.

Po ashtu, në takim u diskutua edhe për mundësinë e bashkëpunimit në bujqësi, duke qenë se siç tha ajo “të dyja vendet kanë potencial të madh zhvillimi në këtë fushë”.

Në këtë takim është diskutuar edhe për përafrimin e mëtejmë të të rinjve me kulturën e njëri-tjetrit dhe “rritjen e komunikimit ndërmjet dy vendeve tona, sidomos të të rinjve tanë”.

“Intensifikimi i bashkëpunimit të të rinjve tanë mund të arrihet më së miri nëpërmjet rritjes së shkëmbimeve akademike, bursave të studimit dhe bashkëpunimit ndëruniversitar”, nënvizoi Osmani.

Osmani në Itali pritet me këngë dedikuar rrënjëve shqiptare

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.