Kosova

Osmani siguron: Asociacioni i pakëson të drejtat e serbëve


Vjosa Osmani

Sipas Presidentes së Kosovës, Vjosa Osmani, Asociacioni i Komunave me Shumicë Serbe i pakëson të drejtat e qytetarëve serbë në Kosovës, dhe assesi e kundërta.

Këto komente, Osmani i ka bërë në një intervistë për “Zërin e Amerikës”, të mërkurën, ku ka theksuar se në raport me qytetarët, nuk duhet të krijohet përshtypja se Asociacioni i ndihmon qytetarëve serbë në Kosovë.

“Në fakt, sistemi më i avancuar i të drejtave të pakicave ekziston tani në Kosovë, me Kushtetutën aktuale, me ligjet e pakos së Ahttisarit dhe me ligjet e tjera që ne i kemi miratuar si rezultat i marrëveshjeve të dialogut”, tha presidentja.

“Me Asociacionin, ju siguroj një gjë, vetëm sa pakësohen të drejtat e qytetarëve, dhe fuqizohet një lloj pushteti mbi ta, pra liderët e Asociacionit – të cilët Vuçiç për momentin e ka për qëllim t’i kontrollojë dhe në një njëfarë mënyrë ta bëj Kosovën shtet jo-funksional”, vlerësoi ajo.

Pra, në prizmin e saj, “Asociacioni nuk iu jep më shumë të drejta qytetarëve serbë”.

“Përkundrazi, merr më shumë të drejta nga poshtë dhe i dërgon lartë, që është në kundërshtim me parimet bazike të Këshillit të Evropës, sipas të cilit për t’i fuqizuar komunitetet pakicë duhet ët ketë më shumë sovranitet nga lartë poshtë dhe jo e kundërta”, potencoi.

Asociacioni në fakt, insiston e para vendit, “e arrin të kundërtën”.

Osmani: Sa më shumë progres në dialog, aq më shpejt Kosova do bëjë hapa drejt BE-së dhe NATO-s

Presidentja e Kosovës, Vjosa Osmani, ka thënë se sa më shumë që të ketë progres në dialogun me Serbinë, që ndërmjetësohet nga Bashkimi Evropian, “aq më shpejt Kosovë do të bëjë hapa vendimtar drejt BE-së dhe NATO-s”.

Këto komente, Osmani i ka bërë në një intervistë për “Zërin e Amerikës”, të mërkurën.

“Por, duhet ta bëjmë një gjë të qartë: Në çdo kontratë, në çdo marrëveshje janë dy palë, dhe është parim bazik i të drejtës ndërkombëtare që në qoftë se një palë tërhiqet nga marrëveshja, atëherë pala tjetër nuk ka asnjë detyrim që të zbatojë pjesën e saj të marrëveshjes”, tha Osmani.

Ajo çka po insistojmë ne si Kosovë, shtoi e para vendit, “jo që ne të ikim nga obligimet tona, por që të ketë zbatim paralel të marrëveshjes së arritur (Bruksel më 27 shkurt, Ohër, më 18 mars 2023)”.

Ajo ripërsëriti se në Marrëveshjen Bazike ka obligime për Kosovën, “disa prej të cilëve vërtetë kanë qenë koncesione të vështira, por ka edhe obligime të qarta për Serbinë, të cilat merren në tërësinë e saj nënkuptojnë njohje de facto të Kosovës, siç është potencuar qartë edhe nga liderët evropianë në deklaratën e tyre të 26 tetorit”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore