Presidentja e Republikës së Kosovës, Vjosa Osmani, këtë të hënë ka udhëtuar në Mal të Zi për të marrë pjesë në Samitin e Demokracisë të Evropës Juglindore me temë “Lufta në Evropë, ndikimi në Ballkan”, të organizuar nga Instituti Ndërkombëtar Republikan nga ShBA-të.
Zyra për medie e presidencës në Kosovë njofton se Osmani do të jetë ndër folësit kryesor dhe në fjalimin e saj do të flasë për zhvillimet e fundit në rajonin e Ballkanit në aspektin e sigurisë, si dhe implikimet e luftës në Ukrainë për Ballkanin Perëndimor.
Përveç Presidentes Osmani, në këtë konferencë do të flasin edhe kryeministri i Malit të Zi, Dritan Abazoviç, zëvendëskryeministrja dhe ministrja për çështje evropiane e Malit të Zi, Jovana Maroviç, zëvendëskryeministri i Maqedonisë së Veriut, Bojan Marichikj, i dërguari i SHBA-së për Ballkanin Perëndimor, Gabriel Escobar, i dërguari i Britanisë së Madhe për Ballkanin Perëndimor, Stuart Peach, i ngarkuari i BE-së për dialogun Kosovë-Serbi, Miroslav Lajçak, si dhe ambasadorë, ministra e zëvendësminitsra nga rajoni dhe përfaqësues të organizatave ndërkombëtare.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
