Osmani, Kurti dhe Konjufca takojnë ambasadorët e QUINT-it, flasin për anëtarësimin e Kosovës në KiE
Presidentja e Kosovës, Vjosa Osmani, kryeministri Albin Kurti, dhe kryetari i Kuvendit, Glauk Konjfuca, këtë të mërkurë janë takuar me ambasadorët e shteteve të QUINT-it (Shteteve të Bashkuara të Amerikës, Francës, Gjermanisë, Italisë, Mbretërisë së Bashkuar dhe atë të Bashkimit Evropian), ku kanë diskutuar në lidhje me anëtarësimin e Kosovës në Këshillin e Evropës.
Lajmi u bë i ditur nga Zyra e Presidencës, të cilët nuk dhanë detaje shtesë në lidhje me këtë takim.
Ky takim i krerëve të shtetit me ambasadorët e vendeve të QUINT-it vjen disa ditë pasi që është miratuar në Komitetin e Asamblesë Parlamentare të Këshillit të Evropës raporti i raportues për Kosovën në KiE, Dora Bakoyannis, për anëtarësimin e Kosovës në këtë organizatë.
Cilat janë procedurat e mëtejme për KiE?
Kosova ka përpara edhe dy faza të tjera para se të bëhet anëtare e plotë e kësaj organizate ndërkombëtare.
Pas votimit të 27 marsit në Paris, kërkesa për anëtarësim e Kosovës procedohet tutje në Asamblenë Parlamentare e cila pritet të mblidhet më 18 prill.
Në rast se edhe këtu Kosova siguron 2/3 e votave të nevojshme atëherë kërkesa e anëtarësimit të Kosovës në KiE i përcillet Këshillit të Ministrave.
Fjalën përfundimtare për anëtarësimin e Kosovës do ta jap Këshilli i Ministrave të KiE-së gjatë një mbledhje që pritet ta mbaj në muajin maj të këtij viti – 2 vjet pasi Kosova dorëzoi zyrtarisht kërkesën për anëtarësim në këtë organizatë ndërkombëtare.
Votimi në Këshillin e Ministrave bëhet në dy nivele.
Në nivelin ministror Kosova duhet të sigurojë 31 vota nga 46 shtete që marrin pjesë në votim
Ndërsa në nivelin e zëvendës-ministrave duhet të sigurojë fillimisht një kuorum prej 31 përfaqësuesish dhe më pastaj votën unanime të tyre ( 31 përfaqësuesit duhet të votojnë për).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com