Osmani kërkesë diplomates belge: Kosova të integrohet në BE, pas marrja së presidencës nga Belgjika

Presidentja e Kosovës, Vjosa Osmani në takimin e së premtes me ministren e Punëve të Jashtme të Mbretërisë së Belgjikës, Hadja Lahbib, ka kërkuar që pasi që shteti i Belgjikës të marr presidencës e Bashkimit Evropian të punohet për procesin e integrimit të Kosovës në BE.

Lajmi është bërë i ditur përmes një komunikate për media të lëshuar nga Zyra e Presidencës.

“Në këtë kontekst, Presidentja Osmani tha se meqë Belgjika e merr presidencën e BE-së më 1 janar 2024, ndaj Kosova është e interesuar të punojë sa më afër me Presidencën belge për të siguruar progres konkret në procesin e integrimit të Kosovës në BE”, thuhet në komunikatë.

Po ashtu, Osmani e ka informuar ministren edhe për situatën e 24 shtatorit në Banjë të Zveçanit, ku mbeti i vrarë rreshteri tashmë i shpallur hero nga institucionet e Kosovës, Afrim Bunjaku.

“Në takim, Presidentja Osmani e ka informuar ministren Lahbib edhe për zhvillimet e fundit politike dhe të sigurisë në Kosovë, posaçërisht në lidhje me agresionin e 24 shtatorit të Serbisë ndaj Kosovës dhe nevojën e adresimit të përgjegjësisë së saj për destabilizimin e Kosovës dhe rajonit”.

Sipas Osmanit, Kosova është një vend modern evropian, demokratik dhe shumetnik që aspiron të bëhet anëtare e plotë e Bashkimit Evropian dhe NATO-s, si dhe e organizatave të tjera ndërkombëtare.

Ndërsa e ka falënderuar Lahbibin për mbështetjen e Belgjikës ndaj Kosovës.

“Në këtë takim, Presidentja Osmani falënderoi  Belgjikën për mbështetjen për integrimin e Kosovës në Bashkimin Evropian, si dhe mbështetjen e ofruar për anëtarësim në Këshillin e Evropës e në procesin e liberalizimit të vizave”.

E para e shtetit, ka shprehur interesim edhe për rritjen e bashkëpunimit mes Kosovës dhe Belgjikës në shumë fusha.

“Sipas Presidentes Osmani, Kosova është e interesuar për rritjen e bashkëpunimit dypalësh, veçanërisht në fushën e ekonomisë, tregtisë dhe investimeve, si dhe marrëveshjen për bashkëpunim në fushat e sigurisë dhe mbrojtjes”.

“Presidentja Osmani ka theksuar se mërgata e Kosovës në Belgjikë luan një rol të rëndësishëm në nxitjen e marrëdhënieve ndërmjet dy vendeve”.

Ministrja e Punëve të Jashtme të Belgjikës, Hadja Lahbib, gjatë ditës ka mbajtur një konferencë të përbashkët me ministren e Punëve të Jashtme dhe Diasporës, Donika Gërvalla, ku ka thënë se normalizimi i marrëdhënieve mes Kosovës dhe Serbisë është mundësia e vetme për integrim evropian të të dyja vendeve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.