Osmani: Javët e ardhshme takohem me ekipin e Scholz dhe Macron, do të diskutojmë propozimin franko-gjerman

Presidentja e Kosovës, Vjosa Osmani, e pyetur nga gazetarët rreth propozimit franko-gjerman të publikuar nga Albanian Post, ka bërë të ditur se në javët në vijim do të ketë takim me ekipin e kancelarit gjerman Olaf Scholz dhe presidentin e Francës, Emmanuel Macron.

“Do të ketë takime në javët në vijim ku ekipi i kanceralit Scholz dhe i presidentit Macron, do të sqarojë në detaje secilën çështje sipas tyre natyrisht, sepse kjo është propozim tek e fundit.  Në fund ju takon palëve nëse do të pranohet apo jo”.

“Ata do të sqarojnë pra në detaje se cilat mendojnë që janë çështjet që mund të grupohen tani në vend se si pika të ndara të trajtohen në Bruksel. Si dhe në afat kohor më të shkurtë sesa që ishte paraparë në fillim të mund të gjitha të adresohen në proces të dialogut të Brukselit”, deklaroi Osmani.

Në një konferencë për media në Forumin Ndërkombëtar për Gratë, Paqen dhe Sigurinë që do të mbahet nën organizimin e presidencës së Kosovës, për gjatë dy ditëve të fundjavës në Prishtinë, Osmani ka folur edhe rreth shumë çështje të tjera.

Sa i përket draftit gjerman për Asociacionin i cili ishte prezantuar të enjten në disa mediume të Kosovës, presidentja e ka quajtur “fake news”.

“Është ‘fake news’, nuk është e vërtet që ekziston një draft gjerman që i është dorëzuar Republikës së Kosovës e as nuk do të ketë. Ata nuk thonë vetëm themelojeni Asociacionin, por edhe e përmendim se asnjë veprim i tillë nuk duhet të jetë në kundërshtim me Kushtetutën e Kosovës”.

“Sekretari amerikan Blinken, rikonfirmoi se nga Kosova nuk do të kërkohet asgjë që do të bie ndesh me Kushtetutën e Kosovë”, ka thënë Osmani.

Osmani për liberalizimin e vizave: Shpresojmë që vendimi të merret më së largu deri në dhjetor

Pritshmëritë e Osmanit, janë që vendimi për liberalizimin e vizave të merret në muajin dhjetor të këtij viti.

“Nga shumica kam marrë garancinë dhe jo vetëm që nuk do kërkojnë kriter shtesë, por do kundërshtojnë dhënien e kritereve shtesë, kritere teknike që kanë përfunduar më 2018, nuk mund të vendosen tani kritere të reja teknike që do të bllokonin vendimmarrjen politike”.

“Mirëkuptim kemi nga shumica dërrmuese, ka 2-3 shtete që i kanë disa shqetësime me të cilat po merremi intensivisht. Jemi duke u marrë me këtë temë me shpresë që në takimet e radhës që mbahen në nivel të grupeve të punës për viza, i pari është më 9 nëntor, të sigurohemi që mos të ketë bllokadë dhe pastaj të shkojë aty ku vendosin ambasadorët dhe pastaj në vendimmarrjen politike”.

Sipas saj, ky vendim do të duhej të merrej gjatë presidencës çeke.

“Është e rëndësishme që vendimmarrja politike të përfundojë gjatë Presidencës Çeke. Po shpresojmë që vendimi merret më së largu deri në dhjetor dhe pastaj hyn në fuqi sipas praktikave të deritanishme që është deri në 6 muaj, e jo të lidhet me ETIAS që askush në Komisionin Evropian nuk e di se kur do të hyjë në fuqi. Ky do ishte diskriminimin ndaj qytetarëve”, ka thënë Osmani.

Osmani: Mbi 90 për qind e serbëve kanë targat “RKS”

Ndërsa për çështjen e heqjes së targave ilegale e cila skadon më 31 tetor, Osmani deklaroi se i gjithë ky proces do të bëhet sipas ligjit.

“Çështja e parë për targat është një temë që jemi duke e diskutuar që shumë muaj, ajo që e kam thënë në takim me zotërin Escobar sa i përket targave është çështja e sundimit të ligjit. Mos të harrojmë që mbi 90 për qind e serbëve që jetojnë në Kosovë i kanë targat e RKS-së, ekziston një grup i vogël që nuk e kanë bërë këtë ndryshim dhe shumica dërmuese nuk e kanë bërë për një arsyeje të vetme sepse ata kërcënohen nga bandat kriminal, banda kriminale të cilat paguhen  dhe mbështeten politikisht nga Aleksander Vuçiç”.

Sipas presidentes, shtyrja e vazhdueshme nënkupton që po pranohen kërcënimet e bandave kriminale.

“Shtyrja e vazhdueshme nënkupton që po tolerohen këto kërcënime të bandave kriminale në raport me serbët lokal. Prandaj, po e them që kjo çështje është mbi të gjitha çështje e sundimit të ligjit nuk është assesi kundër Serbisë është një çështje që ka të bëjë me mbrojtjen e tyre nga këto banda kriminale sepse mbi të gjitha serbët që jetojnë në Veri janë vazhdimisht nën presionin e tyre, nën frikësimin e tyre dhe nën kërcënimet e tyre dhe siç e dini ka raste kur atyre u janë djegur shtëpitë, u janë djegur makinat vetëm sepse ata kanë respektuar ligjin”.

“Pra, për ne kjo është çështje e sundimit të ligjit dhe Kosova asnjëherë nuk ka ndërmarrë asnjë veprim që do të krijonte tensione”.

Osmani thirrje shqiptarëve të Luginës: Tregoni se janë trojet tuaja, javën e ardhshme takohet me liderët

Osmani në këtë konferencë adresoi edhe thirrje tek shqiptarët e Luginës së Preshevës, Bujanovcit dhe Medvegjë që të marrin pjesë në procesin e regjistrimit të popullsisë që ka nisur më 1 tetor dhe zgjatë deri në fund të muajit.

Ajo tha se shqiptarët duhet të bashkohet kundër politikës shoviniste të Serbisë.

“Derisa, Serbia përmes një politike shoviniste vazhdon ta përdorë spastrimin etnik si mjet administrativ për t’i larguar shqiptarët nga Lugina, të gjithë shqiptarët duhet të bashkojnë forcat duke eliminuar pengesat që po i bën Serbia në procesin e regjistrimit, përgjatë këtyre javëve kam pasur takime me institucione vendore dhe ndërkombëtarë, ku kam ngritur këtë çështje, kam kërkuar që ndërkombëtarët të takohen me liderët politikë të Luginës”.

Gjithashtu, bëri të ditur se javën e ardhshme do të takohet me liderët shqiptarë.

Ky takim edhe pse ishte paraparë që të mbahet më herët sipas Osmanit, është shtyrë për shkak të vizitave zyrtare të krerëve të shtetit në vende të tjera.

“Të hënën do t’i takojë të gjithë liderët nga Presheva, Bujanovci dhe Medvegja. Të gjithë shqiptarët duhet t’i bashkohen procesit të regjistrimit, si dhe të tregojnë se janë troje që kanë jetuar gjithmonë dhe aty do të qëndrojnë përgjithmonë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.