Osmani: Aleanca me Mbretërinë e Bashkuar është jashtëzakonisht e rëndësishme

Presidentja e Kosovës, Vjosa Osmani, të shtunën, ka njoftuar se në margjinat e forumit global të sigurisë “GLOBSEC 2024” në Pragë të Çekisë ka takuar Ministrin për Evropën dhe Amerikën e Veriut të Mbretërisë së Bashkuar, Stephen Doughty.

Nëpërmjet një njoftimi në platformën sociale, X, Osmani është përkujdesur të theksojë se aleanca e Kosovës me Mbretërinë e Bashkuar është jashtëzakonisht e rëndësishme.

“Në Pragë, ishte kënaqësi të takoja ministrin Doughty. Marrëdhënia jonë e veçantë dhe historikisht e fortë siguron një themel të fortë për të përparuar më tej bashkëpunimin tonë”, shkroi ajo.

KFOR-i ka rritur praninë në urën kryesore mbi lumin Ibër më 31 gusht.

Rritja e pranisë së KFOR-it mbi urën mbi lumin Ibër vjen një ditë pasi autoritetet e Kosovës mbyllën pesë komuna paralele serbe në Veri të Kosovës.

Aksioni është kritikuar nga bashkësia ndërkombëtare, e cila i ka bërë thirrje Qeverisë së Kosovës që të mos ndërmarrë veprime të njëanshme dhe të pakoordinuara.

Ambasadori i Britanisë së Madhe në Prishtinë, Jonathan Hargreaves, është shprehur i shqetësuar për aksionin e së premtes në Veri të Kosovës, ku u mbyllën pesë komuna paralele, duke thënë se veprime të tilla mund të nxisin tensione.

“Veprimet që ndikojnë thelbësisht në mirëqenien e serbëve të Kosovës dhe të komuniteteve të tjera joshumicë kërkojnë konsultim të kujdesshëm me miqtë e palëkundur të Kosovës dhe partnerët e sigurisë, në kontekstin e dialogut më të gjerë”, shkroi Hargreaves në Facebook.

“Veprimet e sotme në veri të Kosovës u kryen pa këtë dhe rrezikojnë të nxisin tensione dhe të prekin më të cenuarit”, ka shkruar ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.