Shqipëria

Ndërkombëtarët urojnë qeverinë e re “Rama 3”


Fill pas betimit në Institucionin e Presidencës të qeverisë së re “Rama 3”, të shtunën e 18 shtatorit, ambasadorja amrikane në Shqipëri, Yuri Kim, ka uruar Kryeministrin dhe ministrat e rinj.

“Urime Kryeministrit në nisjen zyrtare të mandatit të tretë historik”, shkruan Kim në median sociale Twitter.

Ambasadorja thekson bashkëpunimin më tej mes SHBA-ve dhe Shqipërisë. “Presim të punojmë intensivisht për të forcuar demokracinë, mbrojtjen dhe biznesin”.

Ajo e mbyll postimin duke uruar në gjuhën shqipe. “Urime dhe suksese!”.

I menjëhershëm ka qenë dhe urimi nga ambasadori i Bashkimit Evropian në Shqipëri, Luigi Soreca. Ky i fundit përmes një postimi në Twitter përgëzoi qeverinë e re.

“Përgëzojmë kryeministrin Edi Rama dhe Qeverinë Shqiptare në marrjen e detyrës së tyre”.

Ai bëri gjithashtu me dije se, BE-ja pret që, “integrimi dhe të gjitha reformat e ndërlidhura, të shfaqen lartë në agjendën e Qeverisë”. Këto të fundit, sipas tij, mund të arrihen përmes koordinimit të fortë ndërinstitucional.

Ndërsa, Komisioneri për Fqinjësinë dhe Zgjerimin, Oliver Varhelyi në urimin e tij u shpreh se, “pret me padurim të punoj me qeverinë e re dhe pret gjithashtu që sundimi i ligjit të shfaqet në rend të parë në agjendë”.

“Dialogu konstruktiv politik dhe koordinimi i fortë kyç për pranimin në BE”, deklaroi Varhelyi.

Urimi i parë ka ardhur nga Organizata për Sigurinë dhe Bashkëpunimin në Evropë (OSBE).

Nëpërmjet një postimi në median sociale Twitter shkruhej se OSBE-ja priste me padurim të punonte për katër vitet e ardhshme me qeverinë dhe Kuvendin e Shqipёrisё.

“Jemi gati të luajmë rolin tonë në mbështetje të agjendës ambicioze të reformave të dëshiruara nga shumica qeverisëse, opozita dhe bashkësia ndërkombëtare”, theksohej në postimin e OSBE-së.

Ambasadori Britanik në Shqipëri, Alastair King-Smith, pas marrjes zyrtarisht të rikonfirmimit në detyre si ministre për Evropën dhe Punët e Jashtme uroi në zyrën e saj Olta Xhaçkën.

King-Smith më tej shprehu gatishmërinë dhe bashkëpunimin me qeverinë e re të vendit tonë, e cila sot nisi zyrtarisht detyrën, për të tretin mandat radhazi.

“Prioritetet e reja të qeverisë së Shqipërisë do të jenë në qendër të vëmendjes së Birtanisë së Madhe për të përparuar prosperitetin, reformat, sigurinë dhe lidhjen dypalëshe”, e mbylli ai postimin në median sociale Twitter.

Betimi i “Rama 3”

Qeveria e re “Rama 3”, të shtunën e 18 shtatorit u betua pranë Institucionit të Presidencës – një ditë pasi mori votëbesimin në Kuvendin e Shqipërisë.

Në orën 10:00, Kryeministri i Shqipërisë, Edi Rama, së bashku me ministrat e kabinetit qeverisës, iu drejtuan Presidentit të Republikës së Shqipërisë, Ilir Meta, për ceremoninë e betimit.

Kjo e fundit zgjati shumë pak. Më pas kabineti vazhdoi rrugën në këmbë – duke respektuar sinjalistikën – për në Kryeminstri, ku do të mbahet mbledhja e parë e qeverisë së re.

12 gra dhe katër burra. Ky do të jetë kabineti i ri qeveritar “Rama 3”, i shpallur nga Rama, më 2 shtator në Asamblenë Kombëtare të Partisë Socialiste.

Për herë të parë në historinë moderne të Shqipërisë, PS-ja do ta udhëheqë vendin në mandatin e tretë qeverisës radhazi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore