Për të dytin vit radhazi, Orges Shehi është shpallur fitues i çmimit “Trajneri i vitit”, pasi zhvilloi një tjetër sezon të suksesshëm me ish-skuadrën e tij KF Tirana.
Të nominuar për të fituar këtë çmim ishin edhe trajneri i Egnatia-s, Edlir Tetova si edhe trajneri i Laçit, Mirel Josa.
Në mbrëmjen gala që po mbahet sonte në Teatrin Kombëtar të Operas dhe Baletit, ish-trajnerët e ekipit Kombëtar, Gianni De Biasi dhe Edoardo Reja i dorëzuan trofeun e rëndësishëm, Orges Shehit, i cili u shpreh i lumtur që është vlerësuar me këtë çmim për të dytin vit radhazi.
“Ndihem shumë i nderuar, sepse jam këtu mes dy personaliteteve dhe figurave të mëdha të futbollit tonë dhe futbollit evropian. Si Reja dhe De Biasi, i cili ka qenë një indicie e madhe që t’i futem trajningut”, ka thënë ai.
Po ashtu ka shtuar se “ndihet krenar që vij këtu për herë të dytë radhazi, jam shumë i kënaqur”.
“Dua të falënderoj gjithë trajnerët dhe kapitenët që më kanë votuar, si dhe ish-klubin tim, Tiranën”, ka theksuar Shehi.
Sot po mbahet mbrëmja gala e Federatës Shqiptare të Futbollit “Më të Mirët 2023” ku do të vlerësohen protagonistët kryesorë të futbollit, djem dhe vajza, të cilët kanë shkëlqyer me paraqitjet e tyre në fushën e lojës.
FSHF ka përgatitur një mbrëmje festive të pasur edhe me program artistik në Teatrin Kombëtar të Operas dhe Baletit, që do t’i dedikohet futbollit vendas dhe Kombëtares kuqezi që mbylli një edicion fantastik kualifikues, me objektivin e arritur finalet e Europianit “Gjermani2024”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
