Operacioni “Tempulli”, Gjykata e Tiranës cakton masën për 61 të arrestuar

Gjykata e Tiranës ka dhënë të shtunën e 16 shtatorit masat për 61 të arrestuarit e tjerë të operacionit “Tempulli”.

Masa e sigurisë ka ndryshuar vetëm për tre prej tyre, të cilët janë arrestuar duke kaluar nga arrest në shtëpi në detyrim paraqitje.

Ndërsa për 58 të tjerët është caktuar masa “arrest në burg”.

Më herët, Gjykata la në burg 29 nga 233 të arrestuarit në kuadër të megaoperacionit të koduar “Tempulli”.

Ai ishte një ndër operacionet më të mëdha policore kundër trafikut të drogës ka ndodhur në Shqipëri që në orët e para të mëngjesit të 14 shtatorit.

Në kuadër të tij u shkatërruan 23 rrjete kriminale të shpërndarjes së narkotikëve, u dhanë 296 masa sigurie të lëshuar dhe 233 masa tashmë të ekzekutuara, të cilat shohin pas hekurave shpërndarës të drogave.

Është në fakt një fushatë e gjatë e nisur nga Policia e Shtetit gjatë vitit, por mbi të gjitha e promovuar nga ministri i Brendshëm, Taulant Balla, me marrjen e tij në detyrë.

Në detajet e bëra të ditura prej tij dhe Drejtorit të Përgjithshëm të Policisë së Shtetit, Muhamet Rrumbullaku, duket se kryefjala dhe çelësi i suksesit për këtë arritje në rendin shqiptar ka vetëm një emërues: Ruajtja e sekretit hetimor.

Arrestimet masive në fakt erdhën si “surprizë” edhe për mediat, të cilat nuk kanë publikuar ditët e fundit lajmërime se një megaoperacion i tillë është i pritshëm në gjithë vendin.

Suksesi i lartë i arrestimeve po ashtu, bën të duket se edhe së brendshmi, strukturat e rendit kanë kryer një punë të vlerësuar për ruajtjen e sekretit hetimor.

Këtë gjë e nënvizoi disa herë edhe ministri Balla, i cili përtej se nuk e fshehu gëzimin për një aksion të tillë, tha gjithsesi se Agjencia e Mbikëqyrjes Policore do t’i vijojë kontrollet e rrepta mbi efektivët e rendit dhe çdo shkelje të mundshme të etikës dhe detyrës brenda uniformave blu, do ta ndëshkojë.

Pse ky operacion ka rëndësi të veçantë?

Aspekti i parë lidhet me faktin se operacioni është zhvilluar pak ditë pas nisjes së sezonit të ri shkollor në gjithë vendin.

Shënjestër kryesore në fakt kanë qenë ata, të cilët ministri i Brendshëm i etiketoi si “spaçatorë” – pra shpërndarës të drogave të lehta e të forta në perimetra shkollorë, të cilët sot janë të rrethuar nga Policia dhe mbikëqyren aktivisht nga efektivët e rendit.

Po ashtu, operacioni vjen në ditën kur në Tiranë, po zhvillohet një ministerial tepër i rëndësishëm i ministrave të Brendshëm të gjithë Bashkimit Evropian, në kuadër të mbajtjes së ardhshme të Procesit të Berlinit në Tiranë.

Ky është edhe një mesazh i qartë ndaj bashkësisë ndërkombëtare se Shqipëria po kërkon një reformimi në radhët e bluve.

Teksa, nuk duhet anashkaluar fakti suksesi ka qenë i lartë, pasi nga 296 masa arresti, 233 janë ekzekutuar dhe të tjerat janë në zhvillim, pasi operacioni vazhdon për kapjen e 63 të mbeturve.

Ku u shtri operacioni dhe çfarë u evidentua?

Pjesa më e madhe e të arrestuarve janë anëtarë të grupeve kriminale në Tiranë, Durrës, Korçë, Elbasan dhe Vlorë.

Shtrirja e këtij operacioni gjithsesi ka qenë në rangun e tetë muajve dhe gjatë kësaj kohe, janë sekuestruar “829 kilogramë kanabisi, një pjesë e përpunuar në formë çokollate, 61 kilogramë heroinë, 5.2 kilogramë drogë ekstazi dhe të ndaluar në tërësi në tetë muaj janë 1 mijë e 541 shtetas për shitje lëndësh narkotike”.

Ministri Balla ka nënvizuar se asnjë grup kriminal nuk do të lejohet të veprojë brenda perimetrit të sigurisë në shkollat e vendit dhe se format e dënimit për raste të tilla do të dyfishohen.

“Do dyfishohen format e dënimit për shpërndarjen e shitjen e lëndëve narkotike brenda perimetrit të sigurisë së shkollave”.

Ai ka nxitur Policinë e Shtetit ta ruajë këtë qasje të re në luftën kundër narkotikëve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.