Lajme

Gantz urdhëron vazhdimin e sulmeve ndaj Xhihadit Islamik


Ministri i Mbrojtjes i Izraelit, Benny Gantz urdhëroi ushtrinë izraelite që të vazhdojë të synojë qelizat e Xhihadit Islamik dhe të parandalojë sulmet me raketa nga Rripi i Gazës.

Ndërkohë që, Ministria palestineze e Shëndetësisë, tha se numri i të vrarëve nga sulmet izraelite që nga fillimi i operacionit “Breaking Dawn” të premten, ka arritur në 12.

Forcat e Mbrojtjes izraelite sulmuan rreth 30 objektiva të “Xhihadit Islamik” në Rripin e Gazës gjatë natës mes të premtes dhe të shtunës, tha zëdhënësi i IDF Ran Kochav, ndërsa operacioni “Breaking Dawn” hyn në ditën e dytë.

Avionët dhe tanket izraelite shënjestruan dhe shkatërruan pesë raketahedhës, si dhe gjashtë punëtori të prodhimit të armëve dhe disa poste vëzhgimi të “Xhihadit Islamik”.

Kochav tha fillimisht se 10 palestinezë u vranë dhe 80 u plagosën në sulmet. Nuk u raportua për viktima izraelite dhe udhëzimet e Komandës së Frontit të Brendshëm mbeten të pandryshuara, shtoi ai.

“Sipas ushtrisë izraelite, rreth 160 raketa janë hedhur në drejtim të Izraelit nga Rripi deri më tani, me 60 prej tyre të kapur. Plot 95% e përpjekjeve të përgjimit të ushtrisë izraelite ishin të suksesshme”.

Pas përshkallëzimit në Rripin e Gazës të premten në mbrëmje, sekretari amerikan i Mbrojtjes Lloyd Austin foli me ministrin izraelit të Mbrojtjes Benny Gantz.

Departamenti Amerikan i Mbrojtjes tha se “sekretari mori përditësime mbi sulmet e IDF që synonin Xhihadin Islamik Palestinez në Rripin e Gazës dhe hapat që qeveria e Izraelit po ndërmerr për të mbrojtur qytetarët e saj nga raketat e lëshuara në Izrael nga Rripi i Gazës”.

“Ai nënvizoi të drejtën e Izraelit për vetëmbrojtje dhe angazhimin e qëndrueshëm të SHBA-së për sigurinë e Izraelit. Sekretari Austin kërkoi hapa për të de-përshkallëzuar situatën. Ai gjithashtu shprehu shqetësimin në lidhje me raportet për vdekjet e civilëve dhe bëri thirrje për një hetim në kohë dhe të plotë për çdo viktimë civile”.

Ndërkohë, tensionet mbeten të larta.

Fillimisht, Forcat e Mbrojtjes të Izraelit (IDF) thanë se kishin rifilluar sulmet me raketa kundër pozicioneve të shumta të militantëve në Gaza, duke vazhduar sulmet deri në orët e para të mëngjesit.

Të shtunën, Izraeli tha se kishte arrestuar 19 anëtarë të PIJ në bastisjet në të gjithë Bregun Perëndimor.

Shkëmbimi i zjarrit brenda natës shënon përshkallëzimin më serioz të dhunës që nga lufta 11-ditore e majit 2021, e cila la më shumë se 200 palestinezë dhe një duzinë izraelitë të vdekur përpara se të aprovohej një armëpushim.

Egjipti, i cili ka vepruar si ndërmjetës midis dy palëve në të kaluarën, thuhet se po ofron të veprojë si një ndërmjetës edhe një herë në një përpjekje për të parandaluar përshkallëzimin e mëtejshëm.

Zyrtarët e Kajros po përgatiteshin të shtunën për të pritur një delegacion të mundshëm të përfaqësuesve të PIJ-së si pjesë e atij procesi, thanë media egjiptiane.

/Albanianpost.com

Lajmet kryesore