OJQ-të kërkojnë nga Bërnabiç të reagojë ndaj gjuhës së urrejtjes të Vulinit kundër shqiptarëve

Më 27 maj, një grup i organizatave joqeveritare dhe individëve nga Beogradi dhe Kosova kanë dënuar gjuhën e urrejtjes së ministrit të Punëve të Brendshme të Serbisë, Aleksandar Vulin, ndaj shqiptarëve.

Përmes një deklarate të përbashkët, ata kanë bërë thirrje tek Qeveria e Serbisë dhe kryeministrja Ana Bërnabiç që të reagojnë dhe të dënojnë faktin se Vulini vazhdon të përdorë një emërim fyes për shqiptarët.

Sipas tyre, Vulin ka përdorur disa herë një emërim fyes, duke folur për shqiptarët më 20 maj.

“Gjyqësori i Serbisë, në vitin 2018, përcaktoi se fjala ‘shiptar’ ishte fyese dhe është shënuar si gjuhë urrejtjeje. Zyrtarët publikë që përdorin gjuhën e urrejtjes nuk e kanë vendin në pushtet”, shtohet në deklaratë, shkruan mediumi serb Danas.

Këto organizata joqeveritare, kanë theksuar se gjuha e urrejtjes minon përhapjen e vlerave evropiane në shoqëri, sundimin e ligjit dhe funksionimin e një shoqërie demokratike dhe tolerante.

“Retorika e përdorur nga ministri Vulin në fjalimin e tij është e njëjtë me atë të përdorur nga mediat dhe zyrtarët gjatë viteve ’90, për të dehumanizuar popullatën shqiptare dhe për të nxitur ngacmimet, shkeljet e të drejtave të njeriut dhe në fund krimet e luftës në Kosovë”.

Kjo deklaratë e përbashkët është nënshkruar nga organizatat relevante nga Serbia dhe Kosova, si dhe profesoresha e Universitetit të Beogradit, Jelena Lonçar dhe aktivistët për të drejtat e njeriut, Rrahim Salihi, Valon Arifi dhe Vjollca Arifi.

Që nga fillimi i vitit 2021, në faqen e ministrisë së Punëve të Brendshme të Serbisë, mund të gjenden më shumë se dhjetë njoftime që përmbajnë këtë shprehje përçmuese.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.