Numri i lartë i përfitueseve të asistencës sociale, dëshmi për krizën socio-ekonomike

Gjendja socio-ekonomike në vend është rënduar edhe më tej nga pandemia e cila ka gllabëruar çdo fushë të jetës jo vetëm në Kosovë por, gjithandej botës.

Vendet e vogla që nuk e kanë të zhvilluar industrinë dhe nuk kanë të ardhura të tjera përveç grumbullimit të taksave, janë vende me ekonomi jo-stabile dhe çdo lëvizje e lehtë ndikon në jetën e përditshme të qytetarëve, përkatësisht në shportën e tyre.

Kosova si vend i vogël dhe me një paqëndrueshmëri ekonomike së fundi pavarësisht rritjeve ekonomike të proklamuara nga qeveria, shporta e qytetarit është varfëruar.

Numri i rasteve të cilët janë përfitues të skemës sociale në vend është shumë i lartë.

Albanian Post ka kërkuar nga Ministria e Financave, Punës dhe Transfereve të ketë qasje në raportin mujorë të muajit gusht për shfrytëzuesit e ndihmës sociale sipas QPS-ve.

Sipas raportit, regjioni i Ferizajt ka gjithsejtë  3 mijë e 880 familje përfituese të skemës sociale me 16 mijë e 358 anëtar, regjioni i Gjakovës, 1 mijë e 729 familje me 7 mijë e 42 anëtarë, ai i Gjilanit 2 mijë e 227 familje me 8 mijë e 444 anëtar, ai i Mitrovicës 6 mijë e 566 familje me 24 mijë e 277 anëtarë, ai i Pejës me 2 mijë e 639 familje me 10 mijë e 639 anëtarë, ai i Prishtinës me 6 mijë e 11 familje me gjithsejtë 24 mijë e 707 anëtarë dhe regjioni i Prizrenit, 2 mijë e 486 familje me gjithsejtë 10 mijë e 214 anëtarë.

Sociologu Albert Mecini për Albanian Post ka thënë se numri i lartë i familjeve me asistencë sociale në vend, dëshmon për krizën e vazhdueshme shumëdimensionale në Kosovë.

“Shkaqet janë nga më të ndryshmet, por po të analizojmë zhvillimin ekonomik të Kosovës përgjatë dy dekadave të kaluara, atëherë do të vërejmë se Kosova si shtet, ka ngecur në orientimin e saj drejt një ekonomie prodhuese, duke favorizuar kështu vetëm aspektin e shërbimeve dhe importin”.

Institucionet kanë dështuar në krijimin e një strategjie afatgjate

Ai ka thënë se hendeku i pabarazisë sociale është rritur si rezultat i dështimit të krijimit të një strategjie të mirëfilltë.

“Kjo ka bërë që në vazhdimësi të rritet hendeku i pabarazisë sociale dhe pamjaftueshmërisë ekonomike për shumë familje në Kosovë, me ç’rast mundësitë për gjetjen e një vendi stabil të punës në rrethana të tilla, janë të vogla dhe jo shpresëdhënëse”.

Një dështim tjetër sipas sociologut Mecini është edhe paaftësia e institucioneve për të krijuar një strategji edhe në arsim, përkatësisht në orientimin profesional të të rinjve.

“Aspekt tjetër që ka ndikuar në përkeqësimin e gjendjes ekonomike për familje të shumta, përgjatë periudhës së lartpërmendur kohore, është deri diku edhe dështimi institucional dhe shtetëror në politikat arsimore dhe orientimin profesional të të rinjve, dhe përgjithësisht kategorive shoqërore që janë më të cenuara sa i përket aspektit financiar.

Kjo ka krijuar mungesë të profileve profesionale.

“Sot jemi dëshmitarë se kërkohen punëtorë në sektorë të ndryshëm profesional, mirëpo që fatkeqësisht nuk kemi numër të mjaftueshëm të të kualifikuarave për ato profesione në të cilat hapen vendet e lira të punës, ndërsa në anën tjetër kemi një numër të madh të të papunësuarve!”, ka thënë Mecini për Albanian Post.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.