Normalizimi i kritikave të Perëndimit, rezultat i diskursit të Kurtit

Ndonëse kritikat e bashkësisë ndërkombëtare, posaçërisht të Shteteve të Bashkuara të Amerikës dhe Bashkimit Evropian ndaj Kosovës janë ashpërsuar, ato nuk kanë krijuar reaksion te qytetarët kosovarë, por as tek opozita që të ndërmarrin ndonjë veprim për të kundërshtuar ekzekutivin e Kosovës në raport me marrëdhëniet me aleatë, derisa e gjithë kjo situatë nga njohësit e çështjeve politike po konsiderohet si një diskurs që kryeministri Albin Kurti ka arritur ta imponojë.

Vendimi i fundit i Bankës Qendrore të Kosovës (BQK), për ndalimin e dinarit serb për pagesa në territorin e Kosovës bëri që ndërkombëtarët të artikulojnë kritika të padëgjuara më parë ndaj Prishtinës zyrtare për shkak të moskoordinimit me ta për këtë çështje.

Madje, zyrtarë të lartë amerikanë, përfshirë Ndihmës-Sekretarin e Shtetit për Evropë dhe Euroazi, James O’Brien, kanë bërë të ditur se ky vendim ka cenuar raportet në mes të dy shteteve, por – përsëri – as kjo nuk krijoi reagim qytetar, pasi që tanimë kritikat e aleatëve po normalizohen.

E gjithë kjo situatë e krijuar sipas sociologut Shkodran Ramadani, ku indiferenca qytetare ndaj kritikave ndërkombëtare po normalizohet, është rezultat i kultivimit të një procesi të gjatë, dhe fajin më të madh në këtë mes, ai e sheh te partia që ka pushtetin, pra Lëvizja Vetëvendosje, për të cilën thekson se ka ushqyer mllef qytetar ndaj vendeve aleate.

“Indiferenca qytetare kundrejt tensionimit dhe dëmtimit të raporteve me aleatët tonë, në veçanti me ShBA-të, është rezultat i një procesi të gjatë të kultivimit të një ideologjie që mundohet të nënvlerësojë rolin e bashkësisë ndërkombëtare në krijimin e shtetit të Kosovës. Madje, do të thoja se nuk është vetëm indiferencë, por është edhe një sentiment aktiv që i përçmon dhe i përbuz ndërkombëtarët”, thotë Ramadani në një prononcim për Albanian Post.

“Mirëpo, tash për tash, për këtë gjë, më së shumti fajin e bart LVV-ja, e cila që nga themelimi si parti e ka ushqyer një mllef qytetar kombëtar kundër SHBA-ve, e tash edhe ndaj BE-së”, shtoi.

Edhe për ish-deputetin e LVV-së, Afrim Kasolli, është e qartë se fajtori kryesor që ka ndikuar që qytetarët t’i pranojnë pa shqetësim kritikat e aleatëve është ish-partia e tij.

“Prej pozicionit të opozitës ajo i ka sulmuar partitë e ‘establishmentit’ si servile dhe të dëgjueshme ndaj Bashkësisë Ndërkombëtare në përgjithësi dhe ShBA-ve në veçanti. Procesin e dialogut, negociatave, dhe kompromiseve si në negociatat e Vjenës dhe ato të Brukselit e ka anatemuar si proces që e cenon shtetësinë dhe jo si hapa të domosdoshëm për ta fituar miratimin dhe mbështetjen e shteteve perëndimore në favor të shtet-ndërtimit”, thekson Kasolli në një bisedë për AP.

Për zyrtarët e këtij subjekti politik, nënvizon ai, “këto veprime ishin pasojë e një klase të korruptuar politike që për të shpëtuar vetën, bëhej e dëgjueshme ndaj ndërkombëtarëve kundër shtetit”.

“Pra sipas narracionit, të kultivuar ndër vite të Vetëvendosjes, i tërë ky proces i komplikuar diplomatik i koordinimit me partneret ndërkombëtarë ishte thuajse një komplot kundër interesave fundamentale shtetërore”, shton.

Kasolli, për ta argumentuar tutje se VV është fajtori kryesor për këtë çështje, kujton deklaratat e Kurtit ku thoshte se “aleanca me Amerikën është e tejkaluar, e vjetruar dhe nuk është aleancë e së ardhmes”.

“Po ashtu, janë të njohura pohimet tjera të se ndërkombëtarët nuk lëvizin pa lëvizur ne. Kur ne rrimë ata qëndrojnë sipër nesh. Kur ne lëvizim ata vijnë pas nesh. Dhe Kurti ka premtuar se me të ardhur në pushtet do ta korrigjojë këtë raport të subordinimit dhe dominimit”, shton ai.

Mirëpo, me të marr pushtetin, potencon Kasolli, “ai e ka parë peshën e tij të vogël në këtë skemë të madhe gjeopolitike”.

“Atëherë ka filluar të kërkojë shtegdalje në mes detyrimeve ndërkombëtare të shtetit dhe plotësimit  partive të elektoratit të tij në një formë tragji-komike për shtetin. Fillimisht duke u pajtuar me kërkesat e ndërkombëtareve për marrëveshje për normalizim me Serbinë me shpresën për ta ruajtur relevancën e tij e ndërkombëtare, në anën tjetër duke hapur tema të veçanta sikur se kjo për dinarin me qëllim që shtyhet sa më tepër zbatimi  i obligimeve për të cilat është zotuar, që ta ruajë aureolën e heroit para galerisë së brendshme elektorale”, pohon.

Por, në një nuancë pak më ndryshe nga Kasolli, i cili fajin kryesor dhe të vetëm e sheh tek VV-ja, Ramadani, një pjesë e bart edhe teke opozita, për të cilën thekson se nuk po arrin që të krijojë momentum, por edhe tek bashkësia ndërkombëtare, për shkak të kërkesave që të njëjtit kanë në raport me Kosovën sa i përket koncesioneve ndaj Serbisë.

“Opozita është mjaft e dobët edhe apatike për shkak se ajo po sillet e pafuqishme për të lënë gjurmë në tërë këtë situatë. Nuk po arrin qëllimin e saj që të krijojë momentum në favor të sajin dhe ta pasqyrojë drejt situatën si është tani”, vlerëson Ramadani.

“Por, edhe qytetarët, normalisht se me kohën kanë krijuar një mospëlqim për ndërkombëtarët, sepse, sipas tyre, ata nuk janë në anën e Kosovës dhe vazhdimisht po i kërkojnë Kosovës që të bëjë lëshime, kompromise të padrejta në raport me Serbinë dhe me kohë është ngulitur në mendjen e qytetarëve kjo ide që SHBA-të më nuk janë pro-Kosovës si kanë qenë në të kaluarën”.

Madje, në prizmin e aktivistit politik, deri në një masë qytetarët edhe mund të kenë të drejtë “për shkak se ShBA-të dhe ndërkombëtarët tani nuk janë 100 për qind pro-Kosovës, por kanë plane edhe për akomodimin e Serbisë, e në proces e sipër të këtij akomodimi kërkohet më shumë lëshime nga pala kosovare”.

“Por, duhet thënë se Kurti e ka pranuar lëshimin më të madh. E ka bërë në Bruksel dhe Ohër me pranimin e planit franko-gjerman [Marrëveshja Bazike], i cili ka ‘Zajednicë’, por nuk ka njohje nga Serbia. Pra, ky është kompromisi i madh”, vlerëson Ramadani.

“E pakuptimtë përplasja me aleatët për çështje të vogla”

Edhe Ramadani, por edhe Kasolli, vlerësojnë se përplasja e qeverisë së udhëhequr nga Kurti me ndërkombëtarët, është e pakuptimtë për këto çështje, si dinari e targat, pasi që vlerësojnë se kryeministri i ka pranuar koncesionet, posaçërisht ajo për Asociacionin e Komunave me Shumicë Serbe [në kuadër të Marrëveshjes Bazike, Bruksel më 27 shkurt, Ohër më 18 mars].

Sipas sociologut Ramadani, Kurti, përmes këtyre çështjeve të vogla po mundohet që ta mirëmbajë reputacionin e tij si njeri “rezistent, kokëfortë që nuk nënshtrohet ndaj trysnisë ndërkombëtare”.

“Duhet ta kemi parasysh që tensionet me ndërkombëtarët nuk po bëhen për çështje të mëdha, por për çështje të vogla, ky është dëmi më i madh. Sepse, Kurti, aty ku do të duhej të tregonte më shumë durim, rezistencë e këmbëngulje është çështja e ‘Zajednicës’ dhe njohjes dhe jo tek këto çështjet që janë të rëndësisë të vogël”.

Ndërsa, për analistin politik Kasolli, kreu i ekzekutivit kosovar ka ndjekur një strategji “të dyfishtë”, sepse, shton ai, “fillimisht duke i acaruar raportet e Kosovës me shtetet mike perëndimore për shkak të veprimeve të njëanshme dhe duke u pajtuar në fund për t’i trajtuar këto tema në procesin e dialogut në Bruksel”.

“Mirëpo kjo qasje është fatale për Kosovën. Sepse në këtë mënyrë shteti ynë gjendet në procesin e dialogut i vetmuar dhe pa përkrahje ndërkombëtare, si duke i pasur në anën e kundërt të gjitha ato shtete perëndimore që kanë qenë meritore në procesin historik të çlirimit dhe shtet ndërtimit”, pohon.

Thënë këtë, ai ka parasysh tensionet globale që po shtohen dita ditës, dhe “kur siguria globale po bëhet gjithnjë e më fragjile” normalizimi i kësaj kritike dhe gjuhe politike “do të prodhojë asi pasoja që do ta normalizojnë edhe veprimet e shtetit të Kosovës në drejtim të kundërt me interesat, prirjet dhe kërkesat e shteteve mike”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.