Njohja e targave RKS mirëpritet edhe në Beograd: Vetëm respektimi i marrëveshjeve çon në stabilitet dhe pajtim

Lëvizja opozitare pro-perëndimore “Glas/Zëri” në Serbi mirëpriti vendimin e Qeverisë së Serbisë për të lejuar lëvizjen e lirë të të gjitha automjeteve nga Kosova në territorin e Serbisë, derisa shtoi se pret sjelljen para drejtësisë të organizatorëve dhe autorëve të sulmit të armatosur terrorist në Banjë të Zveçanit – komunë e banuar me shumicë serbe – në veri të Kosovës.

“GLAS mirëpret vendimin e Qeverisë së Serbisë për të mundësuar lëvizjen e lirë të automjeteve me targa të Kosovës në territorin e Serbisë, i cili është miratuar për të lehtësuar pozitën e individëve dhe për të mundësuar lirinë e lëvizjes”, thuhet në deklaratën e një prej lëvizjeve të rralla liberale në Serbi, derisa përshëndet edhe progresi në zbatimin e marrëveshjeve të dialogut.

“GLAS vazhdimisht avokon që asnjë nga qytetarët e Kosovës të mos jetë peng dhe viktimë e politikave shtetërore dhe aspiratave të qeverive në Beograd dhe Prishtinë. Ne presim që ky hap i Serbisë, së bashku me sjelljen para drejtësisë të organizatorëve dhe autorëve të sulmit terrorist në Banjë, do të kontribuojë në qetësimin e përgjithshëm të tensioneve”.

Në këtë drejtm, lëvizja opozitare serbe konsideroi se tash është e nevojshme të organizohen zgjedhjet lokale në veri të Kosovës – Mitrovicë e Veriut, Leposaviq, Zveçan dhe Zubin Potok – të cilat, sipas saj, do të rezultojnë me përfaqësues legjitimë të qytetarëve të atjeshëm dhe kthimin e pjesëtarëve të komunitetit serb në institucionet qendrore të Kosovës.

“GLAS nënvizon se vetëm respektimi i plotë i marrëveshjeve të arritura dhe zbatimi i planit evropian për Kosovën çon në stabilitet dhe pajtim, si dhe në rrugën e përbashkët të Serbisë dhe Kosovës drejt integrimeve të mëtejshme euroatlantike si shtete fqinje aleate dhe mike”, thuhet ndër të tjera në deklaratën e lëvizjes “Glas” të mërkurën.

Zëdhënësi i Bashkimit Evropian (BE) për Politikë të Jashtme dhe Siguri, Peter Stano, nëpërmjet një postimi në platformë “X” të martën, ka thënë se BE-ja mirëpret vendimin e Qeverisë së Serbisë për të lejuar lëvizjen e lirë të të gjitha automjeteve nga Kosova në territorin e Serbisë nga 1 janari i vitit 2024, derisa ka shtuar se unioni tash pret lëvizjen e Kosovës.

Stano ka konsideruar se vendimi i ekzekutivit serb, përveç se paraqet një “hap pozitiv” në zbatimin e Marrëveshjes Bazike (Bruksel, 27 shkurt) dhe Aneksit të Implementimit (Ohër, 18 mars), përfshirë obligimet e mëparshme (2011), tregon se progresi në dialogun për normalizimin e marrëdhënieve ndërmjet Kosovës dhe Serbisë është i mundur nëse ekziton vullneti i palëve.

“Ai gjithashtu përfaqëson një hap në drejtimin e duhur drejt një integrimi më të mirë rajonal dhe evropian të Ballkanit Perëndimor, nga i cili në fund përfitojnë qytetarët e rajonit. Ky vendim i hap rrugën një heqje të plotë të regjimit të letrave ngjitëse. BE-ja tani pret që Kosova të përgjigjet në mënyrë të ngjashme”, ka deklaruar ndër të tjera Stano.

Drejtori i të ashtuquajturës “Zyrë për Kosovën” në Qeverinë e Serbisë, Petar Petkoviç, ka njoftuar të hënën e 25 dhjetorit se Serbia ka marrë një vendim që do ta mundësojë lëvizjen e lirë të të gjitha automjeteve nga Kosova në territorin e Serbisë, duke insistuar njëkohësisht se ky vendim nuk duhet të kuptohet si njohje de facto e pavarësisë së Kosovës.

Vetëm gjatë javëve të fundit, mijëra serbë të Kosovës i kanë regjistuar automjetet, duke hequr dorë nga targat ilegale serbe, derisa numri i qytetarëve serbë që kanë zgjedhur t’i konvertojnë targat nga ilegalet në RKS (Republika e Kosovës), ka shkuar në mbi 4 mijë, duke iu përgjigjur në mënyrë pozitive afatit të dhënë nga Qeveria e Kosovës në nëntor të këtij viti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.